Wat khuslai don 334 ki petrol pump pahuh umphniang bad tyndong shet jingshet, ong ka swati

Ka tnad Food Civil Supplies & Consumer Affairs ka jylla ka la pyntip ba ka jingpynpoi ia ki umphniang petrol, diesel bad gas LPG ha Meghalaya ka iaid beit iaid ryntih bad kam don kano kano ka jingkyrduh haba iadei bad ka jingsuplai.

Ka State Level Co-ordinator ka Meghalaya Oil Marketing Company ka Swati Mudoi haba kren hynne ka sngi sha ki lad pathai khubor ka la ong ba ka jylla Meghalaya ka biang bad kam don kano kano ka jingkyrduh Petrol, Diesel bad ki tyndong shet LPG Gas ruh ki biang pura lut baroh.

Ka Swati ka la pyntikna ruh ba ka jingbuh kynton (Stock) ia ka gas LPG bad kiwei ki kynja umphniang, ka long kaba biang bad kaba pahuh.

Katkum ka jingiathuh ka Swati, haduh mynta ki don kumba 334 tylli ki Petrol Pump ha ka jylla Meghalaya. Na kine, ka IOCL ka don 205 tylli, ka BPCL ka don 43 tylli, ka HPCL ka don 72 tylli bad jong ki riewshimet kynthup ia ka Essar Oil, Shell bad Reliance ki don 14 tylli.

“Baroh ki Petrol Pump ki treikam pura bad ym don kano kano ka jingkhang ne jingmana ban die. Ka jingpyndonkam ka long kumba ka ju long ha ki bnai Kyllalyngkot haduh Lber 2026 bad kane ka pyni ba ka jingdonkam ka long kaba thikna. Namarkata, ki paidbah kim dei ban sngew syier,” ong ka Swati.

Haba iadei bad ka jingsuplai ia ki gas LPG, ka la iathuh ba ki la pynbiang sha kumba 3.7 lak ngut ki nongpyndonkam gas lyngba 66 tylli ki dukan die gas ha ka jylla baroh kawei bad mynta ki dukan die gas ki biang ka kynton ba la buh lypa bad kam don ka jingduna gas kumba la sawa ki khubor hamsaia.

Ka la bynrap ruh ba ha ka shi sngi, ki don kumba 4103 tylli ki gas ba la lah ban pyndap bujli ban pynpoi sha ki iing.

Ha kajuh ka por ka la kyntu ia ki nongpyndonkam Gas ba kidei ban book online bad ban pyni ia u Delivery Authentication Code (DAC) ha ka por ba shim ia ki gas khnang ban pyntikna ban don ka jingshngain bad ka jingkhuid ha ka rukom sam.

Haba iadei bad ka jingpynpoi gas sha ki longiing kiba ioh jingiarap na ka scheme PMUY (Pradhan Mantri Ujjwala Yojana) ha Meghalaya, ka Co Ordinator jong ka Meghalaya Oil Marketing Company ka la iathuh ba ka jingpynpoi ia ki gas ka long kumba 1,942 tylli ha ka shi sngi.