Ka jingiaid lynti u samla Donald bad Lambokstarwell kum ki nongialam KSU

Katno ka jingbynnud bad jingsngewsih ba khraw ban phai dien sha ka jingim ki nongialam ba la aiti lut ia la ka jingim na bynta ka jaitbynriew lyngba ka Khasi Students’ Union (KSU). Napdeng kine lai ngut ki nongialam ba pawbha ki long u Samla Donald V. Thabah, General Secretary ka KSU bad u Samla Lambokstarwell Marngar President ka KSU bad u Samla Biangbor Lyngdoh Paliar Vice President ki long kiba la trei shitom, khlem tyngkai bad ki la ai ti lut met bad mynsiem ban shakri ia ka Ri bad ka jaitbynriew.

U Samla Donald V. Thabah u la pynïasoh bad ka KSU naduh ka rta 18 snem, kum u samla ba stad bad ba trei shitom ula ïohi ïa ki jingeh ba ktah ïa ka imlang sahlang ha Mawprem namar ka jingïakhleh jaitbynriew bad ka jingkiew ki kam sniew bad ka jingbym shngain ki trai ri. Kane ka jingsngewkhia ka la pynlong ïa u ban shim ïa ka sienjam ban rung ha ka KSU Mawprem Circle.

Ka jingïaid lynti jong u ka la kiew stet kum u GS ka Mawprem Circle, Organising Secretary ka NEHU Unit (2007), Assistant Publicity Secretary CEC (2008), Education Secretary CEC (2012) bad naduh u snem 2017 haduh ka samoi treikam 2023–26 ula long u General Secretary ka KSU CEC. Ka jingtrei jong u kam dei tang ha ka kyrdan, hynrei ka paw ha ka jinglen lade, ka jingïaleh bad ka jingïaineh ha ki por jingeh wat haba u hap ban mad ïa ki jingshah thwet kiba lah bunsien, ki jingshah kynthoh bad ka jingduh ha ka jingim shimet jong u.

U Samla Donald u long u nongïalam uba stad, uba tih bniah bad uba skhem ha ki nongrim. U long u hynmen ïa ki dkhot kiba dang rit bad u para ïa ki nongïalam kiba rangbah. Ka mynsiem jingïarap, ka jingïadei jan bad ki paidbah bad ka jingïalam kaba shlur kala pynlong ïa u ban long uwei na ki nongïalam ba ki paidbah ki shaniah bad burom. Watla ki aiñ sorkar bad ki mokotduma kiba bun u la shah pyngat, hynrei ka mynsiem jingïaleh jongu na ka bynta ka jingshngain ka jaitbynriew ka dang ïai kyrsiew mynsiem bad pynrhem ïa kiwei ki samla Khasi ban ïasoh sha ka KSU ban ïada ïa ka jaitbynriew.

Ha kajuh ka por, u Samla Lambokstarwell Marngar uwei na ki nongïalam ba tbit ha ka KSU. U la rung kum u dkhot ha KSU Jaiaw Lansonalane Unit, hynrei namar ka jingtrei shitom ula kiew kum u nongïalam KSU banyngkong kum u General Secretary ka Unit bad hadien hapoh ka Jaiaw Circle kum u GS. Ka jinglong jong u kum u briew ba beit ba sngewrit bad uba lah ban pynïatylli ïa ki dkhot ka la pynlong ïa ki nongïalam ban ithuh ïa ka sap jong u.

Hadien ula rung hapoh ka KSU CEC bad ula bat ïa shibun ki kam kum u Assistant Education Secretary, President ka KSU NEHU Unit bad kum u Finance Secretary. Ha u snem 2017, ula shah jied kum u President KSU CEC bad ha u snem 2020 ula bteng kajuh ka kyrdan haduh ka samoi 2023–26.

U Samla Lambokstarwell u long u nongïalam ba kohnguh sneng bad burom ïa ki rangbah bad kiba halor. Kum u nongïalam um ju iehnoh ïa ki dkhot hynrei u don bynta lang bad ki ha baroh ki por naduh ki dkhot barit haduh ki nongïalam ba rangbah. U dei u nongialam ba shlur ban kren ïa ka jingshisha uba skhem ha ka nongrim bad ïohi jngai.

Ka jingpule jong u ruh ka long kaba lah biang bha: u la pyndep ïa ka MA Philosophy na NEHU. Wat haba ula ïoh lad ban rung ha ka kam sorkar kaba don burom, u la kyntait noh namar u jied ban aiti lut ïalade ha ka jingïalam jong ka KSU bad ka jingshakri ïa ka jaitbynriew Khasi.

Katba u Vice President ka Seng u Samla Biangbor Lyngdoh Paliar u la rung sha ka seng KSU ha u snem 1998 lyngba ka Nongkwar Unit. Nongkwar Unit bad ka kam ba u la bat ka dei Finance Secretary Nongkwar Unit, nangta sha ka kyrdan President Nongkwar Unit, Office Secretary Mawlai Circle, nangta General Secretary Mawlai Circle, Assistant Organising Secretary CEC, Organising Secretary CEC.

Khatduh u la shimti khatduh syndon ia ka kam Vice President CEC. Ula shah kem bunsien ha ki issue bapher bapher jong ka seng. Ula shah pynshitom ruh ha ki bor ka aiñ kat haduh ban da mynsaw bad khrew, haduh kine ki sngi u dang bat hi kum u Vice-President ka KSU na ka bynta ka samoi treikam 2023-26.

Lah ban ong ba kine ki lai ngut ki nongialam ki dei ki nuksa ba im jong ka jingialam kaba shisha, ka jingaiti, ka jingialeh bad ka jingiaineh, wat ha ka juk internet kaba ki riew wohdong-wohñia ki shim kabu tang ban kynnoh na ki kyndong kynshrot. Kine ki nongialam kila mad ia shibun ki jingeh, ki jingshah pharep, ki jingshah thwet, ki jingshah pyntyrha bad wat ki jingshah thep mokotduma hynrei kim shym la kynran dien. Ki la iaineh ban ieng ha ka hok bad ban iada ia ka Ri bad ka jaitbynriew.

Kum ka jaitbynriew, la dei ban sngew sarong ba ka KSU ka lah ban iai sei kum kine ki nongialam kiba shlur, kiba ym ju pynjem bad kiba long ka jingiatylli jong ki paidbah ka jaitbynriew. Ki dei ki “Khlur ka Ri” kiba tynshain lynti ia ka mynta bad ki pateng ban wan.

Ki dkhot ka KSU kila pynpaw ia ki kyntien, “Khublei shibun ia u Samla Donald V. Thabah, u Samla Lambokstarwell Marngar bad Samla Biangbor Paliar ia ka jingiai aiti bad jingialeh jong phi. Ngi duwai ba U Blei un dang kyrkhu ha koit ka khiah, ka jingstad bad ka mynsiem ban bteng ia kane ka lynti kaba eh hynrei kaba don burom. Maitshaphrang ki Nongialam ka Ri, im slem ka KSU, im slem ka Bri U Hynniewtrep.

“Wat tieng la phi dei ban tur na ka ding ne da ka snam, kin poi tang ki briew kiba shlur sha ka kyrdan jong ka nam, dei u rangbah kein, ka shnong ka mon ba jwat, ia u phi lah ban beiñ hynrei kumno phin rat,” la pynkut ki dkhot ka KSU da ki kyntien shongsbai u Mylung Soso Tham.