Ialam bakla u Bah Prestone, ki bym don Aadhaar kin duh jingmyntoi

Ka AIM Meghalaya State Chapter lyngba u Chairman Bah Banshai Marbaniang ka pynpaw ka jingsngewkhia halor ka jingkren Symbud Myntri Rangbah ka jylla u Bah Prestone Tynsong lyngba ki lad pathai khubor da kaba ong, ki nongshong shnong bym don Aadhaar kim ioh jingmyntoi na ki skhim sorkar pdeng bad sorkar Jylla bad pynpaw ba don ki kynhun ba pyrshang ban ialam bakla, kane ka pynpaw ba um pat lah ban ialam ia ki paidbah ka Jylla.

Ka AIM kam shym la ialam bakla ia ki paidbah nongshong shnong ki bym pat pdiang ia u Aadhaar khamtam haba phai halor ki longïing ba duk ba kyrduh. Ka jingiaid lynti ka kynhun ka long ban bud ryntih katkum ki rai jong ka ïingkashari ba hakhlieh duh ka Ri India bad ki rai ka ïingkashari jong ka Jylla Meghalaya. Ka kynhun kan ieng skhem katkum ka Riti Synshar Paidbah jong ka Ri India khlem da ialam bakla iano iano ruh.

Ka jingkam u symbud myntri rangbah ka long ka bym don nongrim bad pyrshang ban ialam pynbakla ia ki paidbah nongshong shnong ka Jylla. Kum u Symbud Myntri Rangbah u dei ban long shai ka jingtip lada phai katkum ka rai jong ka Supreme Court badon burom ka Ri India, ka rai ha ka mukotduma ba iakhun da u Justice K.S. Puttaswamy (Retd.) pyrshah ia ka Union of India, ka la batai ba ym dei ban kyntait ia ki nongshong shnong tang namar bym don Aadhaar. Ka jingpyndonkam ia u Aadhaar kam dei ban wanrah ka jingiapher ne pynduh ia ki lad jingmyntoi ia ki briew ba dei hok ban ioh.

Ka AIM ka la kdew kum ka Aadhaar Act, 2016 (Targeted Delivery of Financial and Other Subsidies, Benefits and Services) ka la pynpaw ha ka Section 3 ban pynshong nongrim ia ka jingiashim bynta ha u Aadhaar ka dei katkum ka mon sngewbha (voluntary). Ka Section 7 ka ai bor ban pyndonkam Aadhaar tang na ka bynta ka jingsam jingmyntoi hynrei ka kdew shai ba lada ki briew kim don Aadhaar dei ban ai lad da kiwei ki kot ki sla ban ioh na ki lad jingmyntoi na ki skhim sorkar. Ha ka Section 8 ka ong, ba ka jingpynshisha (authentication) ka dei ban long katkum ka aiñ, ka jingiahap (proportionate) bad ka jingmynjur jong u briew (consent-based).

Ka kynthoh ka jingkren u Symbud Myntri Rangbah ka pynpaw ba u pynkheiñ ia ki hok ba la ai da ka Riti Synshar ka Ri India katkum ka Article 14 (Right to Equality) ka hok ban iaryngkat ia baroh ha ka aiñ. Ka jingkyntait ban ai ki jingmyntoi tang namar ka jingbym don Aadhaar ka wanrah jingiapher bad leh shilliang lada bishar hok katkum ka Article 21 (Right to Life and Personal Liberty), ka pynpaw ban iada ia ka hok kynthup ka bam, ka jingsumar bad ki jingiarap ba kongsan. Ka jingpynduh ia ki jingiarap tang namar ba ki paidbah kim don Aadhaar ka dei ka jingpynkheiñ ia ka hok.

Ka AIM pynpaw ka Meghalaya High Court badon burom ka la pynshai ba ka jingbym don Aadhaar kam dei ka daw ban kyntait ia ki jingmyntoi. Ka sorkar ka dei ban pynthikna ba ithuh ia ki paidbah lyngba kiwei ki kot ki sla. Namarkata halor ka jingkren u Symbud Myntri Rangbah ka Jylla da kaba ong, “ki paidbah bym don don Aadhaar kim lah ban ioh jingmyntoi”, ka sakhi ka wanrah ka jingpyrshah beaiñ ia ka Aadhaar Act, 2016 bad ka long pyrshah ia ka rai jong ka Iingkashari Supreme Court bad ka Meghalaya High Court bad ka dei ka jingkheiñ noh ia ka Riti Synshar ka Ri India (Indian Constitution).

Ka la kynnoh ka jingkren u Symbud Myntri Rangbah ka paw ban u iuh roit khlem da burom shuh ia ka ïingkashari ba hakhlieh duh ka Supreme Court bad kumjuh ia ka High Court Mehalaya. Kumta ka AIM kyntu ia ki bor sorkar bad ki nongmihkhmat ban kren da ka jingkitkhlieh bad burom ia ka aiñ. Ka jingpynsaphriang ia ki jingtip ba ialam bakla bad pynduh ki lad jingmyntoi ia ki paidbah ka long beain. Ka AIM kan shimkhia bad ki paidbah kim dei ban duh jingkyrmen bad ngin iakhun ban iada ia ki hok ki paidbah nongshong shnong ba yn ym don mano mano ba shah pynduh ia ki lad jingmytoi ba dei hok namar bym don Aadhaar.