Shah pyniap ka samla Khasi ha Bengalaru, suba ba leh samla

Ka Khasi Students Union (KSU) Bengalaru ka la pynpaw ka jingsngewlem halor ka jingkhlad kynsan noh kawei ka samla Khasi ba sah wai ha Hebbal, Begaluru.

Kane ka samla khasi kaba la tip kyrteng kum ka Agatha Ba Ithianghun Khongwet na ka shnong Tangmang, Pynursla, East Khasi Hills, Meghalaya, ka la khlad hynnin ka sngi Balang ha ka por kumba 7 baje ne 7:30 eiei janmiet ha iingwai, kaba la pyntip ba ka la sahlang bad uwei u briew ba la kynnoh u dei u samla jong ka uba la tip kyrteng u Nawaz Sharif na Manipur.

Ka KSU ka la pyntip ba kane ka kes mynta ka dang don hapoh ka jingtohkit ki pulit bad kim pat lah ban tip la ka dei ka daw la ka pyniap hi ne ka shah pyniap.

Katkum ka jingiathuh u General Secretary ka KSU Bengaluru u samla Younidame Suchiang, kane ka samla khasi ba la khlad ka dei kaba trei ha kawei ka kompeni Amazon ha Bengaluru.

U la iathuh ba ki pulit ka Bengaluru hynnin ka sngi ki la rah noh ia u Nawas Sharif sha thanad ban tohkit bniah halor kane ka jingjia bad ki pulit ki dang ap ia ka Forencis khnang ban lap ia ka daw jong kane ka jingiap.

Na ka liang ki dkhot ka KSU Bengaluru Unit, hynnin ka sngi mar ia ioh jingtip ka la leit ban ai jingiarap ryngkat ka jingdonlang ki paralok ban ai ka jingkyrshan lada donkam.

Na ka liang ka seng ka la kyntu ia ki bor ba halor ba ki dei ban pyllong ia ka jingtohkit halor kane ka jingjia.

Ha kajuh ka por, ka seng ka la phah ia ka khubor sngewlem sha kiba haiing hasem jong kane ka samla.