Tang ki kam barit baria trei ki trai Jylla ha hotel Vivanta & Marriott, ki kam baheh pat ioh tang ki bar Jylla: Ardent

Haka jingialang pynshai paidbah ka voice of the people party ba kala pynlong mynta ka sngi ha stand Ummulong Iawmusiang Jowai haka jingdonlang naduh ki MLA jong ka ba kynthup u Brightstarwell Marbaniang, u Ardent Miller Basaiawmoit, u CEM ka JHADC u Winston Tony Lyngdoh nalor kiwei pat ki MDC VPP napoh KHADC bad JHADC, u President ka party VPP u Ardent Miller Basaiawmoit haba kren pynshai iaki nongrim ba ka party ka mih ban leit pynsngew paidbah kylleng ki shnong ki thaw ula kdew ruh iaki mat ba ka party ka dawa naka sorkar Jylla.
Haba takraiñ iaki kam ka sorkar MDA hapoh ka jinglamkhmat ka NPP u ong ba bun sa tang ki kam thok shukor bad leh donbor ia u paidbah, bad ki kam ki jam ha kiba bun ki bynta ki paidbah kim shym la ioh bynta namar la knieh bad ioh tang ki briew ba don bynta bad ki haka kam saiñ hima sima.
U ong ba haba sngap iaka jingiathuh jongki ba kila lah ban wanrah skhim daki spah klur, hajar klur, hynrei kine ki skhim baroh ki pynmyntoi tang iaki bar Jylla ym iaki para jaitbynriew haka Jylla.
Haba u kdew iaka mat u Lumpongdeng ba ka sorkar ka thmu shna Taj Resort da kaba kam ruh ba ynda dep bun ki khun samla ka Jylla kin ioh kam kumba long haka hotel Vivanta & Marriott Shillong.
Naka liang u Ardent u ong ba haka jingwad jingtip ba tikna jong u ha kine ki artylli ki hotel thymmai ha Shillong ka Vivanta & Marriott ba wanrah daka sorkar kam shym la long kaba pynmyntoi kumba kam ka sorkar, namar ba ki khun samla ka Jylla kiba trei ha kine ki hotel i ioh ban trei tang da ki kam barit baria katba iaki kam ba kham heh baroh la trei da ki bar Jylla.