Wan iasoh NPP ki nongialam UDP halor ki kam pynroi ka sorkar MDA

U nongialam ka NPP na Mawkyrwat Block uba dei ruh u kyrtong ha ka MLA elekshon 2023, u bah H. Stalyne Diengdoh ula kam ba ha u 2028, ka NPP kan sa ioh biang ban ialam ia ka sokar da kaba suk.

Haba kren ha ka jingialang dang shen, u bah Diengdoh ula ong ba ka NPP mynta ka la don ha lynti jong ka jingjop na Mawkyrwat bad wat na Ranikor konstitwensi ruh.

“Ha u 2028, ka NPP kan ioh biang ban synshar khlem pep, bad kan jop na Mawkyrwat bad wat na Ranikor ruh”, la ong bah Stalyne.

Ula ong ba ka jingwan iasoh ki nongialam bad ki nongkyrshan ka UDP sha ka NPP, ka dei kaba la ia pynbeit bad ia sngewthuh jingmut lang hadien ba ki la iohi ia ki kam ba radbah ka sorkar MDA hapoh ka jingialam ka NPP ba ka la trei shibun ki kam pynroi naduh ka surok, ka umbam umdih, ka koit ka khiah bad ka pule ka puthi ba kiwei de.

Ha kajuh ka por, ula ong ba kan long kaba sngew tynnad eh lada u MLA ka UDP u bah Renikton L Tongkhar un wan ban iasoh lang sha ka NPP bad na ka liang jongu, um don jingeh ha kaba iadei bad ka ticket haba iaid da ka lynti kaba iasngewthuh bad na ka bynta kabab ha.

“Lada wan iasoh sa u MLA ka Mawkyrwat u bah Renikton L Tongkhar, ngi pdiang sngewbha na ka bynta kaba bha bad wat ia ka ticket ruh kam don jingeh”, ula ong.

Lah ban kdew ba dang shen, ki nongialam bad ki nongkyrshan ka UDP na Mawkyrwat konstitwensi kila iasoh noh sha ka NPP ha kaba la pdiang sngewbha ruh da u President ka NPP Meghalaya bah Prestone Tynsong ryngkat kiwei haka jingialang kaba la long ha Mawkyrwat ha ka 2 tarik Jymmang 2026.