Pynshai u Lyngdoh Raid Nongpoh, kim shym thombor ia ki iing ne jaka rep

Da ka jingsngewkhia kaba jur halor ki jingkynnoh pyrshah ia ki nongialam jong ka Dorbar Raid Nongpoh, ha kaba kynnoh ba ki nongialam ka Raid ki la dakhol jubor ia ki jaka rep jong ki nongshong shnong kumjuh ban thombor ia ki iing ki sem, na ka liang u Lyngdoh Raid Bah Linus Lyngdoh u la pynshai ba kine ki jingkynnoh ki dei ki bym don nongrim bad ki bym dei kiba shisha.

Haba kren bad ki Nongthoh Khubor, u Bah Linus Lyngdoh, kum u Lyngdoh Raid u la pynpaw ba kane ka jingkynnoh ba la kynnoh da u Bah Banasar Lyngdoh Nonglait lem bad ki katto katne ngut ki nongrep ka long ka bym dei satia namar kam shym la don satia ka jingthombor ia ki iing ki sem ne wat ban dakhol ia ki jaka rep.

U la iathuh ba katei ka jaka rep ba don halor u Lum Wyrtoh ba dei khmih da ka Dorbar Raid Nongpoh, la ban rep shipor ia ki katto katne ngut ki nongrep ba la bthah ruh ia ki ba kim dei ban kam trai pat ia kane ka jaka rep bad ban nym thung ia ki jingthung ba neh slem namar ka Dorbar Raid ka lah ban shimti biang ha kano kano ka por ba donkam.

U Bah Linus Lyngdoh, u la pynshai ruh ba ia kine ki rai la shim ha ki jingialang ba la long ha ka 11 tarik bnai Jylliew 2022 bad ruh ha ka jingialang kaba la long ha ka 21 tarik bnai Kyllalyngkot 2023 ha kaba la ia donlang ki nongrep ba kynthup ia u Bah Banasar Lyngdoh Nonglait, u Bah Banker Marwein bad i Kong Khroliti Marweiñ, ha kaba la batai shai ba ia katei ka jaka yn nym lah ban kam trai da mano mano bad ba ka Raid ka lah ban shimti biang ha kaba wan ki kam pynroi.

Shuh shuh ruh, u la batai ba ia katei ka jaka la ai wai mynta na bynta 3 snem sha ka tnad Soil ban thung dieng kum ka lad ban iada ia ka khlaw bad ruh ban pynneh pynsah ia ki tyllong umbam bad kam shem la don kano kano ka jingthombor hynrei la iaid katkum ki kyndon jong ka Dorbar Raid.

Na ka liang ka Dorbar Raid Nongpoh ka la pynrem ruh ia ka jingkynthoh lyngba u Secretary ka Hills Farmer’s Union u Bah Alfonbirth Kharsyntiew, ula kren pyrshah ia ki nongialam ka Dorbar Raid khlem da tip ia ka sdang ka kut, da kaba ong ruh ba ka jingwan ban ai mynsiem ia ki nongrep ka long kaba dei hynrei ula dei ban kynduh shwa ruh ia ki nongialam ka Raid ban tip ia ki jingshisha.