Shem jingeh ka sorkar ban khangdam ia ki par dewiong ha Jylla: MR

U Myntri Rangbah ka Jylla u Conrad K Sangma ula ong, ban khang dam ia ki par dewiong ha jylla ka long kaba eh, namar ka jingduna ki nongtrei bad tang hapoh East Jaintia Hills district ki don haduh 22,000 tylli ki par dewiong. Haba iakren ia ki nongthoh khubor hynne ka sngi u Conrad ula ong,“Ngin leh ia katei kumba ngi lah kular naduh ba sdang bad ki don bun bah ki par dewiong, tang ha East Jaintia Hills ki don 22,000 ki par kumba lah pynpaw ha ka kaiphod”.

Ula bynrap ki bor district ki lah ban leh tang khyndiat eh bad ula ong, “Kumta kaei ba ki bor district bad ki nongtrei, ngi pynleit jingmut ha ki 5,000 ne 6,000 tylli ki jaka ha ka shisien leh, kin dang don sa kumba 15,000 tylli kaba ngi shem jingeh ban leh. Haba ngi sdang ban kynriah na ki 5,000 bad pyrshang ban leit sha kiwei pat ki 5,000 tylli bad haba phai biang sha kiba nyngkong ki 5000 tylli ngi hap ban peit bniah ioh ki sdang biang ia ki kam”.

Ula ong kam long kaba suk ban khang dam ia ki 22,000 tylli ki par dewiong.“Kaba kongsan ka long ngi dei ban ieng skhem, ngi lah trei shitom ha ka jingpyrshang bad ki bor district ki lah trei shitom palat ia ka por. Ngi la pynkynriah ia ki nongtrei na katei ka district sha kiwei pat ki district ban iarap bad kyrshan bad ngin iaid bteng ban pynthikna baroh ki sien jam ki dei ban shim na ka liang ka sorkar, kumta baroh ki aiñ bad ki kyndon ka iingbishar dei ban bud ryntih” ula bynrap.