Ka sain pyrthei ka atiar ban sain dur ia ka imlang sahlang: Dr Nonglait

U President ka Khasi Author Society (KAS) u Dr DRL Nonglait hynne ka ngi ula pynbna ba un trei na bynta ka bha ka miat ki paidbah bad ka Jylla bad ban ioh jingithuh ia ka ktien Khasi bad Garo ha ka khyrnit baphra jong ka Riti shynshar ka Ri India.

Ia kane u Dr Nonglait ula kren ha ka jingialang ban rung kum u dkhot ka National People’s Party (NPP) bad ha kajuh ka por hadien ba ula shah jied kum u kyrtong NPP ha ka ilekshon MP shiteng samoi na Shillong Lok Parliamentary Seat.

Ha ka jingkren u Dr Nonglait ula ai khublei ia ki nongialam ka NPP naduh u Conrad K Sangma, Prestone Tynsong, Sniawbhalang Dhar bad kiwei namar ka jingshaniah jong ki kum u kyrtong ka NPP na bynta ka ilekshon MP shiteng samoi.

“Mynta ka sngi nga ieng hakhmat jong phi da ka jingsngewrit bad jingsngewnguh namar ka NPP ka la pynbna paidbah ia ka kyrteng jong nga kum u kyrtong na bynta ka elekshon shiteng samoi ban wan ka Shillong Lok Sabha” la ong u Dr Nonglait.

“Kane ka jinglong kyrtong kam dei ka jingmyntoi shimet, ka dei ka jingkitkhlieh ba khraw na ka bynta ki paidbah bad ka Jylla. Nga pdiang da ka jingaiti lut bad ka jingkut jingmut ban trei na ka bynta ka bha ka miat ki paidbah bad ka Jylla bad ruh na bynta ka jingangnud jong baroh” ula bynrap.

U Dr Nonglait ula pyntip ha ka jingiaid lynti ban ialap ilekshon un pynleit jingmut ha ki mat ba kongsan jong ka Jylla. “Katto katne na kine ki mat ba ngan trei khlem shongthait ki kynthup ia ka jingdawa ban pynrung ia ka ktien Khasi ha ka khyrnit ba phra ka riti synshar ka ri India, ka jingpynkylla ia ka pule dangle naduh ka kyrdan Elementary haduh ka kyrdan Higher Secondary bad ban kyntiew ia ka Higher & Technical Education hapoh ka Jylla” ula ong.

“Ngan ieng iakhun ban bat ia ka jingburom niam hapoh ka Ri. Ka ILP ka dei kawei ka mat ba ngan shimkhia bha, ka jingpynkup bor ia ki samla, ka jingiakhun ban pynneh pynsah ia ka jinglong ba kyrpang ki trai ri trai muluk bad ka jingkiew shaphrang ha baroh ki liang ka Meghalaya bad ka Ri” ula ong.

Haba batai ia ka jingrung jong u ha ka jylli sain pyrthei, u President ka KAS ula ong “Nga la sakhi ia ka jinghiar dor hapdeng ki briew bad ka kam sain pyrthei ka dei kawei na ki atiar ba khlain bha ban pynwandur ia ka imlang sahlang. Haba khmih ia ka jinglong jingman, Nga la rai ban iasoh bad ka NPP bad iakhun ia ka elekshon shiteng samoi da ka jingthmu bad jingaiti ban long ka mluh bad ka jingshai”.

U Dr Nonglait ula iathuh ha ka 30 tarik Iaiong ula ioh pdiang ia ka Phone Call na u Number bym ithuh ha kaba uba phone ula pynithuh ia lade bad u dei, u Conrad K Sangma.

“Nga shu ong “Good afternoon Sir’ bad nga la iathuh ba nga don ha hospital ngan ym lah ban iakynduh ia phi.’ U la kyntu ia nga ban iakren bad u Bah Prestone Tynsong bad ong, “Ngi don hangne bad ngi donkam ia phi” ula ong.

Ula iathuh ha katei ka janmiet, ka kynhun ba don 18-19 ngut ba ialam da u Bah Hamlet Dohling bad u Bah HM Shangpliang ki la wan ban kynduh bad kyrpad ban iakhun ia ka ilekshon MP shiteng samoi na ka tiket NPP.

“Ki la kyrpad ia nga ban iakhun ia ka ilekshon MP shiteng na ka NPP. Nga la ong ha ki ba ngam pat lah ban ai ka rai bad kyrpad ba kin ai por 5 haduh 6 sngi ba ngan pyrkhat ia ka. Hadien ka jingiasyllok bad kiba haiing hasem, ki para ba iatreilang, ki paralok bad ki briew ba ithuh ithaw, nga la rai hynnin ka sngi ban pdiang ia ka jingtyrwa, iasoh bad ka party bad kum u kyrtong ka NPP na bynta ka ilekshon elekshon shiteng samoi ban wan” ula ong.