Sha High Court ujor ka sorkar ba pyllait jamin ia ka Sonam

U Symbud Myntri Rangbah ba khmih ia ka tnat kam pohiing (Police) u Bah Prestone Tynsong ula ong, ba ka Sorkar Jylla ka la ujor sha ka Meghalaya High Court pyrshah ia ka hukum jong ka iingbishar ba hapoh kaba ai jamin ia ka Sonam Raghuvanshi kaba dei ka nongshah kynnoh ba hakhmat ha ka jingpyniap ia la u lok na Indore, u Raja Raghuvanshi.

“Ia mynta ngam dei ban kynthoh ia kata, namar ngi la dep ujor sha ka iing bishar Meghalaya High Court. Kumta ai ba ka iing bishar ba kham heh kan rai namar ba ngi iakhun pyrshah ia ka jamin ba la ai da ka iingbishar bad ngin ia ap ia ka rai ka iing bishar” la ong u Bah Prestone.

Haba ïada ïa ka jingtohkit ki Pulit, u Bah Prestone ula ong, “Em ha ka jingshisha ngi la pyrshang katba lah bad phi iohi wat ka Police Officer bad ka special investigation team (SIT) ne mano mano ruh, ngi la pynkhreh bha.”

“Ha kaba ïadei bad ka jingpynïaid ïa kum kine ki mukotduma, phi tip ïa ki rukom treikam, ki kyndon kiba hap ban bud. Kumta kam don kum kata ka jingbakla na ka liang ki pulit bad kumba nga la ong, ha ka ïingbishar ka ju jia ba kawei ka ïingbishar ka lah ban ai jamin, kawei pat ka ïingbishar ka lah ban pynsangeh ïa ka jamin, kumta ka ïingbishar kan sa rai,” u la ong.

Ha ka 27 tarik Iaiong, ka Shillong Court ka la ai jamin ia ka Sonam Raghuvanshi, kaba dei ka nongshah kynnoh ba hakhmat ha ka jingpyniap iala u kurim, u nongkhaii na Indore (L) Raja Raghuvanshi ha Sohra, hadien ba ka la rai ba ki pulit kim shym la lah ban pyntip bha ia ki nongrim bala kem ia ka.

Ha ka hukum jong ka ban pynbeit ïa ka jingpan jamin, ka ïingbishar jong ka Additional DC (Judicial) DR Kharbteng ka la ong ba ka jingpynkheiñ ïa ka rukom treikam ka la pynkheiñ ïa ka jingïada jong ka riti synshar ka ri katkum ka kyndon 22(1) bad ka la pynthut ïa ka jingïada jong u nongshah kynnoh.

Ka iingbishar ka la kdew ia ki jingbym iahap kiba paw ha ki kot ki sla ban kem iaka.

Ka FIR ha Sohra PS Case No. 7/2025 la register katkum ki kyndon 103(1)/238(a)/309(6)/3(6) jong ka BNS, ka “Intimation of Grounds of Arrest” kaba la ai sha ka Sonam ka la kdew ïa ka kyndon 403(1) ha ka jaka jong ka 13(1).

“La pule bniah ia ka Annexure 8, Ha katei ka Format la kdew ba la ai ha u nongujor, ym shym la buh dak ia kawei ruh na ki Box ban pyni ia ki jingkynnoh ba la kdew pyrshah ia u nongujor,” la pule ha ka hukum.

“Wat ïa ki bynta jong ka aiñ ba la kdew hangtei ka dei ka Sohra PS Case No. 7/2025 u/s 403(1)/238(a)/309(6)/3(6) BNS.”

Ka nongbishar kala kyntait ïa ka jingkynthoh jong ka liang pynngat shaphang ka jingbakla pyndap haki kot, da kaba kdew ba kajuh ka jingbakla ka la paw ha ki kot ki sla kiba bun.