Kular u Myntri ka kit ka bah ban pyntreikam ia ka OTS ban map bai kot kali

Ka Sorkar Jylla ka la rai ban pyntreikam noh ia ka Special One Time Settlement Scheme (OTS) hapoh 10 sngi na bynta ki trok kit mar napoh ka thain Jaintia Hills.

Ia kane la pyntip da u Bah Samiyoo Sayoo Spokesperson ka Joint Action Committee (JAC) jong ka Jaintia Truck Owners Association (JTOA) bad ka East Jaintia Hills Truck Owners Association (EJHTOA) hadien ba wai ka jingialang bad u Symbud Myntri Rangbah ba khmih ia ka tnat Transport u Bah Sniawbhalang Dhar.

Haba kren sha ki lad pathai khubor u Bah Samiyoo ula iathuh ha ka jingialang u Symbud Myntri Rangbah ula kular hapoh 10 sngi, ki trai trok kin ioh ia ka khubor ba bha namar ka Sorkar kan pyntreikam ia ka skhim OTS ban map ia ka bai kot kali katba hap ha ka jingpeit ka Sorkar Jylla.

U Bah Samiyoo ula iathuh ba naduh u bnai Rymphang 2026, ka JAC ka la iakynduh ia u Symbud Myntri Rangbah ban dawa map noh ia ka kuna jong ki kot kali kiba la iap.

“Mynta ka sngi, da ka jinghun ka mynsiem bad da ka jingkmen ngi pyntip ba u Symbud Myntri Rangbah ula hapoh 10-15 sngi ngin sa ioh iaka khubor kaba kmen daka ba ong baka Sorkar kan sa leh iaka ba donkam kata ban map iaka kuna kaba dei jong ka Sorkar Jylla” la ong u Bah Sniawbhalang.

U Bah Samiyoo ula ong ba kane ka jingkukar u Symbud Myntri Rangbah kadei ka khubor kaba bha naka bynta ki trai kali namar don ki por ba ki trai ki hap ban siew arshah ka bai kot kali bad arshah ka kuna, lada kim lah ban siew haka por kaba biang.

Ula ong ba kane ka OTS kan iarap iaki trai kali, namar lada ki kot kali kin im biang, ki trai ki lah ban sdang biang iaka ki kam, bad ki Dribar trok ruh kin lah ban sdang kamai.