Kyntait ka KHADC ban ai Sanad, hap pyllong ilekshon ban jied Syiem Hima Sohra

Ka Khasi Hills Autonomous District Council (KHADC) hynne ka sngi ka la kyntait ia ka jingdawa jong ki Khun u Hajar ka Hima Sohra ban ai sanad noh ia u bah Maremdor Sing Syiem da kaba ai daw ba kam long kaba suk namar ba don sa uwei u Rangbah uba kwah ban ieng Syiem ka Hima Sohra.

Haba kren sha ki lad pathai khubor u CEM u bah Tony Winston Lyngdoh ryngkat ka jingdonlang ki EM kynthup u bah Powel Sohkhlet bad u bah Denzil R. Chen, ki la ong ba ka jingdawa jong ki ban ai sanat ia u Paiem Maremdor kam long kaba suk namar ka la don ka jingwan mih jong uwei u Rangbah uba na ka Kur jong ki hi ba lah ban ieng Syiem bad u kwah ban ialeh ia ka ilekshon Syiem.

“Kam dei ba ngi khlem ai sanad ia ki, na kano kano ka daw. Hynrei ka jingbat ia ka sanad ka long ba katkum ka rukom leh hi, lada don 2 ngut kiba kwah iakhun bad kiba don hok ban iakhun, kumta ia ka shuki jong u Syiem Sohra yn hap ban don beit da ka elekshon bad ki kyndon ain jong ka Council ruh kila batai shai ban hap ban khot thep kyrteng ba kan don ka ilekshon” la ong u EM uba khmih ia ka Elaka u bah Denzil.

Ula ong ba ka Dorbar Hima ka hap ban pynkhreh ia kane ka ilekshon namar ka Hima Sohra ki don 41 ngut ki nongjied bad 12 ngut ki Myntri. Na kine ki nongjied bun na ki ruh kidei kiba la khlad ne don kiba lah pang ne kumta, ki hap ban don biang ia ka jingpyllong ia ka jingjied biang hapdeng ka shnong ne ka raid ban jied ia uta u nongjied.

Haba iadei bad kane, ka KHADC ka la bthah ia u Acting Syiem ba un leh ia ka kam ban wanrah ia ka kaiphod bad ynda lah biang lut, kan long kata ka elekshon.

Na ka liang u bah Bah Powell Sohkhlet u EM ka  ula ong, ba ka KHADC kala thung hi da u Myntri kum u Acting Chief ka Hima Sohra bad hapoh jongu ki don baroh ki Myntri kiba dang shait dang khlain bad ki don ruh ki dkhot jong ka Executive Committee kiba pyniaid ia ki kam ki jam jong ka Hima.

“Hynnin ka sngi, u EM Elaka u lah iakynduh ia u Acting Chief bad ia ki dkhot jong ka Executive Committee bad ka jingleit ka jong ngi ka long ban iakren ia ka jingeh kaba ka Hima Sohra ka iakynduh wat lada kam don ia u Syiem ba pura ruh. Kila iathuh ba ka Hima Sohra mynta ka don hapdeng jong ka jingkyrduh pisa bad uwei na ki dkhot uba dei u Finance Secretary ula ong, ba wat ia ka Mang Tyngka jong ka Hima ruh lah shu mang noh tang 6 bnai namar kam dap pisa ban mang haduh shi snem. U Finance Secretary ula peit bha ia ki jingkhein jingdiah kila shim ia ka rai ba ia kino kino ki jingaiwai la ki long ki jaka pynieng kali ne kino kino ki bynta jong ka Hima Sohra kin leh da ka lynti kaba beit bad kaba khuid bad kaba shai bad kin ai beit sha u briew uba lah ban khlieh ia ka dor” la iathuh u Bah Powell.

Ula ong, ba kila pynpaw ruh ia jingeh ia ka Majai namar mynshwa ki pynieng ia ka Toll Gate ban lum ia ka khajna na ki trok kit mawshun kiba leit khaii sha Bangladesh. Ka iingbishar kala hukum ba kidei ban lum T.200 na kawei ka trok hynrei kala don ka jinglum T.400 bad ki nongkhaii kila ujor da ka mukotduma bad ka iingbishar kala pynsangeh noh ia kane ka jinglum khajna jong ka Hima bad kane kala wanrah ia ka jingduna pisa.

“Ka EC jong ka Hima Sohra kala pyrshang ban leh ia kiei kiei kiban tei bad pynbha ia ka Hima Sohra bad katba ka dang iaid kane ka jingpynbeit ban ioh ia u Syiem ba pura ruh, na ka liang ka EC jong ka Hima Sohra ryngkat bad ngi ruh, ngi ailem ia ka kti kamon kti kadiang khnang ba ngin wanrah ia kaei kaei kaba shai kaba biang khnang ba ka Hima Sohra kan ym don hapdeng jong ki jingeh” la ong u Bah Powell.