Rakhe ka Bellefonte ia ka Jubili Ksiar

Ka Mary Our Help Training Centre, Bellefonte, kaba don ha Lumshyiap, Shillong, kala rakhe ïa ka Jubili Ksiar da kaba pynlong ia ka Mass Bakhuid, ban ainguh ïa U Blei na ka bynta ka jingïaid lynti kaba 50 snem, khamatm ha kaban theh ia ki jingkyrkhu bad ka jinglah ban ai jingshakri ki Sister Salesian ia ka imlang sahlang.
Ka Bellefonte, kaba dei ka ïing jong ka kynhun Daughters of Mary Help of Christians, ka don ka jingïadei kaba kyrpang bad ka Mother Catherine Mania na ri Italy. Ka Mother Catherine ka Superior banyngkong eh ha Bellefonte kala thied ïa ka khyndew ha Lumshyiap ban tei ïa kane ka ïing riewniam. Ka Bellefonte ka ïeng kum ka mawnam jong ka jingaiti bad ka kam kaba ka la trei ban pynïoh ïa ka jaka na ka bynta ka jingpynwandur bad ka jingshakri jong ki Sister.
Ha kane ka jingrakhe ïa ka Jubili Ksiar, la pynkynmaw bad pynapw ia ka jingsngewnguh ïa ka Mother Catherine Mania kaba la plie ïa kane ka shlem ban bteng ïa ka jingïaid lynti jong ka lyngba ki snem bad ban long ka jaka jong ka jingduwai, ka jingpynwandur bad ka jingshakri.
U Archbishop ka Shillong Archdiocese, u Most Rev. Victor Lyngdoh, ula long u nongkñia rangbah ha ka Mass Bakhuid ha kaba la iadonlang u Bishop ka Nongstoiñ Diocese, u Most Rev. Wilbert Marweiñ, ki lyngdoh, ki Sister, ki riewngeit bad kiwei kiwei.
U Archbishop Victor Lyngdoh ula ong, ba ka jingdap 50 snem kam dei tang ka jingñiew ïa ki snem kiba la leit, hynrei kadei ka por ban phaidien bad ban ithuh ïa ki jingkyrkhu jong U Blei bad ïa kaei kaba ula leh lyngba kane ka ïing bad lyngba ka jingim jong kiba la don bynta ha ka.
Ula pynkynmaw ruh ba ka jingim bad ka jingshakri jong kiba la ïaid lyngba ka Bellefonte ki long ka bynta jong ka histori kaba ka shlem ka rakhe bad lyngba ka jingaiti ka jongki, ka kam pynwandur bad ka jingshakri kala bteng na kawei ka pateng sha kawei pat.
U Archbishop ula pynshlur ïa ki Sister ba kin iai bteng ïa ka kam pynwandur ïa ki samla da ka jingieid bad ka jingshaniah ha u Blei.