Rah ka Sanika S. Phawa ïa ka nam Miss Jowai Teenager 2026

Ka Sanika S.Phawa ba na Minmyntdu, West Jaiñtia Hills District kala iohrah iaka nam jop kum ka Miss Jowai Teenager 2026 5th Edition ba pyniaid daka Art & Culture Committee ka dorbar shnong Chutwakhu Jowai haka 3 tarik mynta u bnai ha indoor hall ka dorbar shnong Chutwakhu.
Nalor ka nam Miss Jowai Teenager ka Sanika S.Phawa kala iohrah ruh iaka nam Miss Beautiful Skin, Miss Photogenic bad Best Evening Gown.
Ia ka nam 1st runners la ioh ka Joanna Pala ba naka shnong Ummulong, West Jaiñtia Hills da kaba iohrah ruh iaka nam Miss intellectual.
Ia ka nam 2nd runners up la ioh ka Dasien ika Challam ba naka Panaliar Jowai da kaba ioh ruh iaka nam best state costume.
Kine ki nongjop kila iohrah ruh iaka song poisa ba 50 hajar, 30 hajar bad 20 hajar tyngka.
Ia kane ka jingiakop la pynlong saw kylla ba kynthup ka dancing round, State costume round, Exotic round bad evening gown round.
Ki thei bhabriew nongshim bynta ki don 15 ngut kiba hapoh ka rta 13 snem haduh 19 snem, bad la wan ban bishar da ki 3 ngut ba kynthup ka kong Phiralin Nongbet Mrs international 2019, kong Patricia Mukhim Journalist -activist bad kong Naphisha Pala member fashion society Shillong.
Shwa ban sdang ka jingiakop la don ka jingialang lyngkot ba pyniaid da u waheh shnong Chutwakhu u P.Lyngdoh bad u Dolloi ka Elaka Jowai u Puramon kynjing ula long kum u kongsan ha ryngkat ka jingdonlang ki paidbah nongshong shnong ka Chutwakhu bad kiba nabar ba wan sakhi ia kane ka rynsan iakop thei bhabriew.
U Dolloi haba ai jingkren ula iaroh iaka shnong Chutwakhu ba kala shim ia kane ka sienjam kaba ym tang ban kyrsiew ne kyntu iaki khun ka shnong hynrei ban kyrsiew kyntu ia baroh ki khun ka Rilum Jaiñtia.
U ong kane dei ka jingai mynsiem ba don jingkitkhlieh ka shnong Chutwakhu bad lah ruh ban ong ba ka rah iaka nam ka burom ka shnong Jowai bad ka jaitbynriew.
Bad ka jinglah kane ka rynsan ban poi shaka sienjam ba san dei ba don ka jingrai kut ki nongsdang iaka kumba ka jingsdang dei kaba eh.
Haba kitbok kitrwiang ia baroh kiba shim bynta u ong ymdei ban don ka mynsiem duh jingkyrmen haka jingiaid lynti namar kano kano ka kam ba leh lada ym tyngkhuh jingeh ym lah ban jop bad lada ym don jingbakla ym lah sngewthuh kumno ban pynbeit.
Bad ka jingjop jingrem kam dei ban pynduh jingkyrmen iaka jingiaid lynti ka mynsiem ialeh, hynrei kaba kum kane ka rynsan kan long kaba pynshlur shuh shuh iaki nongshim bynta.