Dawa ka FKJGP ban tehlakam ba ioh rung laitlan ki mrad na shabar Jylla

Ka Federation of Khasi Jaintia and Garo People (FKJGP) hynne ka sngi ka la ai dorkhas ia u Myntri ka Tnad Animal Husbandry & Veterinary Bah Sanbor Shullai bad dawa ba ka sorkar jylla ka dei ban ai jingiada ia ki nongri sniang bad nongri syiar ba kynduh jingeh ha ka kam ri jingri.

U President ka FKJGP u Bah Dundee C Khongsit ula ong, ka jingioh iew ki nongri sniang bad nongri syiar ka long kaba eh ha ka kam ri jingri. Ki sniang bad ki syiar ba mih na jylla kim ioh ka dor ba biang, namar ka jingwan rung ki sniang nabar jylla ha ka dor ba tad lada nujor bad ki sniang ba mih hapoh ka jylla.

Ka FKJGP ka dawa ia ka tnad ban peit bniah ia ka jingioh rung laitlan ki mrad na shabar jylla hapoh Meghalaya, namar kan buh jingeh ia ki nongrep ka jylla ban die ia ki jingri ha ka dor biang.

U Bah Dundee ula pynapw halor ka jingsaphriang ka jingpang African Swine Flu (ASF) bad ka jingiap khlam ki syiar ha jylla ka dei namar ka jingwanrah ia ki mrad na ki ri thor, namar bym don ki jaka set kyrpang (Quarantine and Isolation Centre) ban peit bniah ia ki mrad ba wan rung hapoh ka jylla bad dei na kane ka daw ba ka African Swine Fever bad kiwei ki jingpang syiar ki la saphriang ha katto katne ki bynta ka jylla.

“Ka Tnad sorkar ka ju ai ki jinghikai ia ki nongri jingri ha ki District bad ki Block bapher hynrei ki jinghikai ki shu kut tang noh bad ka tnad kam ju bud dien ban kyntiew ia ki nongri jingri bad ka long tang ban pynsyrwa kai ia ka por ka sorkar bad ki nongri jingri” la ong ka FKJGP.

Ka la pynpaw ha ka por ba donkam jingsumar, ki nongri jingri ki ioh khyndiat ka jingiarap na ka tnad kum ki dawai bad kiwei.

Ka FKJGP ka la pynpaw ka Jylla kam don satia ia ki iew ba thikna bad ka dor ban kyrshan ia ki nongri jingri. Ka sorkar kam ju ai ia ka MSP (Minimum Supporting Price) ia ki nongri ia ka dor ba lah ban shaniah bad ym don ka iew ba thikna.

“Ha ka jingshisha mynta ka don tang kawei ka jaka otdoh ne pyniap sniang ba thikna, ka Modern Multi-Species Abattoir ha Mawlai Mawiong”.

Ka FKJGP ka kyntu ia u Bah Sanbor Shullai kum u Myntri Sorkar ba peit ia ka tnad Veterinary & Animal Husbandary ban shimkhia ia ka jingeh ki nongri jingri ha ka jylla.