Sngewlem bad duwai ka BJP ba shah pyniap ki Pastor ha Manipur

Ka BJP Meghalaya hynne ka sngi ka la pynlong ia ka jingialang ban buh jingduwai kyrpang halor ka jingshah pyniap ki 3 ngut ki Pastor ha ka jylla Manipur.

Ia kane ka jingialang la pynlong hapoh ka jingialam u President ka BJP Meghalaya u Rikman G Momin, ia kaba la iashim bynta lang da u Nongaiktien ka BJP Meghalaya u Bah Mariahiom Kharkrang bad ia kane ka jingbuh jingduwai la ialam da u Vice President u Bah Khrawboklang Basaiawmoit.

Ki nongialam bad ki dkhot ka BJP kila buh jingduwai kyrpang ba u Blei un ai ka jingjah thait kaba junom ia ki 3 ngut ki shakri jong u Blei kiba la khlad noh kiba kynthup ia u Pastor Vumthang Sitlhou, Pastor Kaigoulun Lhouvum bad u Pastor Paogoulen Sitlhou.

U Bah Khrawboklang haba buh jingduwai ula pynkynmaw ia baroh ba u Trai Jisu Khrist ula pynsaphriang ia ka khubor jong ka jingieid bad ka jingiamap, kaba long ka dawai bah ia ka pyrthei hynrei kadei pat kaba iai bteng ban leh kiar da kiba bun ban pynmih pynban ia ka jingiashun bad ia ka kput.

U Bah Kharkrang, ula kyntu ia ki baroh ki dkhot BJP ba kin pynlut por shi minit man la ka sngi ban buh jingduwai na ka bynta ki paitbah ka jylla Manipur kiba la iai bteng ban mad ia ki jingeh bad ki jingjynjar na ka jingmih ka jingiaumsnam ha Manipur.

Ula pynrem ruh ia ki kam thombor bad kam iaumsnam bad pynkynmaw ia baroh ba ka jylla Meghalaya kadei ka jylla kaba shongsuk shongsain bad ula kyntu ia baroh ba dei ban iada ia ka jingsuk ha kano kano ka rukom ruh.

Katba ka Kong Fenela Lyngdoh Nonglait ka la buh jingduwai ba kan don ka jingsuk bad ka jingjai jai hapoh Manipur bad ka la pynpaw ba ka don ia ka jingskhem jingmut ba ki briew kiba donkti ha kine ki kam runar kin shah kem bad kin shah pynsajia katkum ki kyndon aiñ.