Pdiang ka FKJGP ban khang bad plie ïa ka surok na Laitlyngkot sha Lyngkyrdem

Ka Federation of Khasi Jaintia & Garo People (FKJGP) Riwar Mihngi Circle ka la mynjur ia ka jingpdiang u SDO Civil Sub-Division ban khang bad plie ia ka iaid ka ieng ha ka surok naduh rum Laitlyngkot sha Lyngkyrdem jong ka surokbah 260 Shillong-Pynursla-Dawki.Haba kren halor kane u Secretary ka FKJGP Riwar Mihngi circle u bah Meborbaskhem Thabah ula ong ba ka seng ka sngew ban ai khublei ia ka DC East Khasi bad u SDO Pynursla kiba la sngap ia ka jingai jingmut ka seng. U Sub-Divisional Officer ka Pynursla Civil Sub-Division, ula pynbna ba yn khang dam iaid kali saw sngi bad yn plie lai sngi tang hapoh ka por ba la buh ha ka shi taiew naduh ka 25 tarik Jymmang 2026 ha ka bynta ka surok nadum Laitlyngkot shaduh Lyngkyrdem kaba hap ha ka 24-34 Km haduh ban pynbna da kumwei pat.

Ha ka jingpynbna kaba la pynmih ha ka 21 tarik Jymmang 2026, la buh ban plie iaid kali ha ka sngi Nyngkong, Sngi Baar bad sngi Balang bad yn khang naduh ka 11 am haduh 3pm. Katba ha ka sngi Palei, Sngi Thohdieng, Sngi Saitjain bad sngi u Blei, yn khang dam beit baroh shi sngi shi miet. Kane ka jingpynbeit kan long shipor kaban treikam naduh ka 25 tarik Jymmang 2026 haduh ban pynbna da kumwei watla kan ktah jur ia ki paidbah katei ka thain Pynursla. U SDO bah Guatam Warjri ula kyntu ia ki paidbah ban long kiba phikir haba iaid ba ieng sha katei ka thain na ka jingwan ka aiom lyiur bad ban kiar ban iaid ban ieng khamtam ha ka por mynmiet lada ym dei ba donkam.

Kane ka jingkhang iaid kali bad ka jingpynbeit pynthymmai ka long ban ailad ia ka kompeni ruh ba kan dem khui ban tih ia ka surok khnang ban kham sted ka jingpyntrei ban pyndep.