Da ka project kaba nyngkong eh ha jylla wan rah u MLA ha Lyngkhoi

Ka shnong lyngkhoi kaba don hapoh ka Sohiong Constituency, ka la long kawei na ka shnong ka ban ioh ia kawei ka scheme kaba nyngkong eh ha ka jylla bad ha baroh kawei ka thain shatei lam mihngi bad kane ka scheme ka dei ka Modernisation of Command Area Development & Water Management kaba dei jong ka Ministry of Jal Shakti jong ka sorkar kmie.
La pynlong ia ka jingialang paidbah ban pynsngewthuh halor kane ka scheme ha ka 21 tarik jymmang 2026 ha Raid Lyngkhoi Higher Secondary School ha kaba u bah Synshar K.R Lyngdoh, MLA ka thain uba dei uwei uba prat lynti ia kane ka project, u la long kongsan,ka Deputy Commissioner ka East Khasi Hills ka kong Rosetta Mary Kurbah ka la long ka symbud kongsan, ryngkat ka jingdon lang ki heh ophisar jong ka Jal Shakti kiba la wan naduh Delhi, ki engineer bad ki paidbah nongshong shnong.
U bah Synshar haba ai jingkren ha kane ka sngi, u la ong ba kumba ki paidbah ki Shaniah ha la u nongmihkhmat, kadei ka kamram jong u ban peit ia ka jingdonkam jong ki paidbah. U la ong ba u kmen ba hadien ka jingkynduh ia ki ophisar bad ia u myntri sorkar, la lah ban wanrah ia kane ka project bathymmai bad kaba kham phylla sha ka shnong Lyngkhoi.
U MLA u la ong ba sa bun ki MLA kin sa kwah ia kane ka scheme, bad ka jingsted jong u na baroh ki jylla na thain shatei lam mihngi, la lah ban wanrah nyngkong ia kane ka scheme sha ka thain lyngkhoi kaba dei ka shnong ba bun ki nongrep.
U la ong ba ka jingpynrung ia ka um rep sha man kawei pa kawei ki jaka rep, kan long ka jingkyrkhu ia ki nongrep bad ia ka constituency baroh kawei.
Haba pynsngewthuh halor kane ka scheme, ka kong R.M Kurbah ka la iathuh ba ki don 9 tylli ki shnong ba hap hapoh kane ka circle ban pyntrei, ki don haduh 447 ki longiing bad ka jingdon briew ha kane ka circle ki don 3622 ngut ki longiing bad ha lyngkhoi ki don 399 ngut ki nongshong shnong bad kane ka scheme bathymmai kadei kaba nyngkong eh ha ka jylla bad kane ka scheme ka long ban pynpoi um sha man la ki jaka rep, ki hali bad ki pynthor jong ki nongrep kaban long ha ki rukom katkum ka juk kaba mynta.
Ka la iathuh ba kane ka jingwan ka project ha kane ka shnong kan wanrah ia ka jingmyntoi ia ka shnong bad ka jinglah jong ki nongshong shnong ban iatreilang, ka long ka jingkyrkhu ia kane ka project kaba yn shna noh bad yn ai jinghikai ia ki nongshong shnong, kumno ban pyntreikam ia kane ka skhim.
Ka la iathuh ruh ba kane ka project ka shimpor 5 snem ban pyntreikam bad ha kine ki 5 snem yn ai jinghikai ia ki nongshong shnong bad ki nongrep, bad hadien ba kut ka 5 snem, ia kane ka project yn aiti noh ban pyniaid shimet da ka shnong.