U President ka Voice of the People Party (VPP) u bah Ardent Miller Basaiamoit ula ai nuksa ba ka jing-shim kam ka Executive Committee ka VPP ha KHADC ban sospen ia u Syiem ka Hima Mylliem, paiem Ainam Manik Syiem, ka long kumba pynbeit u misteri ia u nar rod uba kdor haba shna iing. Haba kren ha ka jingialang paidbah ha Mawngap ha ka janmiet sngi Saitjain, u bah Ardent ula ong ba haba u misteri u pynbeit ia u nar rod ba kdor, u tied bad hangta ka sa mih ka sur.
“Kane ka dei ka jingpynbeit jong ka VPP ia ka jingkdoh ym ba ka leh jubor bad kam lah ban sngap ia kiba wohdaw ia ka bym shisha,” ong u bah Ardent. U la ong ba haba u pulit u kem ia u nongtuh, u nongtuh un ong um tuh bad lada u pulit u sngap u synei noh ia kata, ka mut la kut. Hynrei ka VPP kan pynkhuid kan pynbeit ia ka jingbakla hynrei ki don kiba kynnoh ba u bah Ardent u dei u nongsynshar donbor hynrei ha u, dei ban leh beit ia kaba dei ban leh na ka bynta ka jingbha.
Halor ka jingbym ai sanad ia u Syiem ka Hima Sohra, u bah Ardent u la ong ba un sa pynshai paidbah ha ka jingialang kaban long ha Sohra ha ka 29 tarik mynta u bnai, khnang ban iashai ki paidbah. Ula ong ba ka EC ha KHADC ka kwah ban bishar bniah bad kim pat kwah ban ong naei ka daw bad kim kwah ban ialam bakla ia ki paidbah.