Shimti u Alban F Syiem ia ka khet Syiem kum Acting Syiem Hima Mylliem

U Paiem Alban Federick Syiem hynne ula shimti ia ka khet Syiem kum u Acting Syiem ka Hima Mylliem hadien ba ka EC ka Khasi Hills Autonomous District Council (KHADC) ka la sospon noh ia u Paiem Ainam Manik Syiem kum u Syiem ka Hima Mylliem. Kum ban shu kdew ka EC ka KHADC ha ka sngi Thohdieng ka la sospon noh ia u Paiem Ainam Manik Syiem halor ka jingkynnoh ba ka hima kam shym la siew khajna iew ba 10 percent sha ka District Council bad um shym la siew ia ka bhah ba 1/8 sha ka Council.

Ha kane ka sngi, ha shwa ba u Paiem Alban un shong ha ka khet Syiem, u Lyngdoh ryngkat ka jingdonlang ki Myntri, ki kur ki la pynspong pynspain ia u ha kamra treikam kum u Syiem. Hadien ba la dep ia ka jingpynspong ia u Paiem Alban la wan ialam sha ka kamra ban shong ha ka khet bishar ha ka jingdonlang ki Myntri, ki bakhraw ki batri, ki kur ki jait bad ki bahaiing hasem ki paralok parajor ban sakhi lang ia kane ka jingshimti ia ka khet kum u Syiem ba shipor ka Hima Mylliem. Haba kren sha ki lad pathai khubor hadien ba la shimti ia ka khet, u Paiem Alban ula ong ba mynta ka sngi un sa thaw ia ka Executive Dorbar ban peit ia ka Hima bad u kular ban ai ka jingsynshar kaba khuid hapoh ka Hima.

Ula iathuh ba ka jingialeh ia ka khet Syiem ka ladei naduh u snem 2021 ha kaba ula ai ia ki kot ki sla bad mynta u la shah thung kum u Syiem ba shipor ka Hima Mylliem ban pyniaid ia ki kam jong ka Hima Mylliem bad ban pynkhuid ia ka synshar khaddar. Haba kylli halor ka jingbym siew ka Hima ia ki khajna sha ka District Council, u Paiem ula pynshai ba ka khajna kam dei T.3000 klur hynrei ka dei T.3,24,85,20 bad kane ka pisa ka dei kaba la pynsah naduh u snem 2018 .