T.51 klur ka Skywalk ha shnong Dympep ban khring nongwan shangkai pyrthei

Ka shnong Dympep ba don ha thain Sohra kan ioh ia ka Skywalk ba nyngkong eh ha ka thain Shatei Lam Mihngi (North East) ha kaba 20% na ka T.51 klur jong katei ka projek lah dep ban pyntrei naduh u bnai Naiwieng 2025.

Ia kane la pyntip da u MLA ka Sohra constituency u Bah Gavin Miguel Mylliem bad ula ong, ba kane ka Skywalk ba jrong 40 meter la khmih lynti ban pyndep ha ki bnai ba khatduh u snem 2027 bad la pyntrei da ka jingthmu ban khring ia ki nongwan jngohkai sha ka shnong Dympep bad ki jaka ba marjan.

Haba kren shaki lad pathai khubor u Bah Gavin ula ong, “Ka jingtrei ka la sdang ha u Naiwieng u snem ba la dep. Kane ka jingtei ka la iaid shakhmat. Katkum ki kaiphod ka tnad la pyndep haduh 20% ia ki jingtrei”.

“Nga ngeit skhem ba shisien ba la dep shna lut kane ka projek kan kyntiew shuh shuh ia ka kam jngohkai ha ka thain Dympep bad ki jaka kiba don marjan. Ka dei kawei na kiba nyngkong eh ha ka thain shatei lammihngi ka ri. Nga tharai ngin lah bha ban khring ia ki nongjngohkai haba ki wankai sha kine ki bynta jong kane ka thain” ula ong.

U Bah Gavin ula pyntip ruh ba ka Nohkalikai Tourism Project hapoh jong ka PM-Divine Scheme kala iohpdiang ia ka bhah tyngka ha u Naiwieng jong u snem bala dep. Ka jinglut jingsep jong katei ka projek kala kot ia ka T.38 klur, lah dep ban khot ia ka tender bad ka jingtrei ia kane ka kam kan sa sdang noh shen.

“Ka jinglut jingsep jong katei ka projek ka long kumba T.38 Klur bad lah dep ban aiti ia ka kam sha u Contractor. Nga tharai kin sa sdang noh ban trei ia ka kam ha kien ki khyndiat sngi kiban wan” ula ong.

Halor ka jingkylli la kan ktah ia ka sawdong sawkun jong ka mariang, u Bah Gavin Mylliem ula ong ba lah dep ban pynwandur na ka bynta ban iada ia ka mariang.

“Haba pynkhreh ia ka detailed project report (DPR) ki Consultant ki la shim lut ia kitei baroh ha ki jingmut jingpyrkhat namar ba ngi sngewthuh ba namar kum kitei ki scheme, ka PM-Divine Scheme bad bun kiwei ki Scheme, ka bynta ka mariang ka long kongsan bha ban buh hakhmat eh, kumta ngam tharai kan don kano kano ka jingktah ia ka mariang” ula ong.