Iakynduh u Conrad ia u Dharmendra, T.100 klur na bynta ka CWSSU

U Myntri Rangbah ka Jylla u Conrad K Sangma ula kynduh ia u Myntri ka tnad pule Sorkar Pdeng u Dharmendra Pradhan hynne ka sngi ha Nongbah Delhi bad pynpaw ka jingsngewnguh ia ka jingtuklar ban thung ia u Vice Chancellor ka North Eastern Hill University (NEHU).

“Kane ka sien jam ba kongsan ban wanrah ka jingpynthikna ba donkam bad la pdiang sngewbha da ki briew hapoh ka University ban pyniaid shakhmat ia ki kam ka University” la ong u Conrad ha ka shithi ha u Myntri ka Sorkar Pdeng.

U Myntri Rangbah ula kyntu ban pynkloi ka jingthungkam na bynta ka jingmyntoi ka jaka pule bad ban thung ia u Vice Chancellor uba don kyrdan jingpule ba biang bad ba shemphang ban pyniaid ia ki kam ban weng ia ki jingeh ka skulbah NEHU.

U la kyntu ia u Dharmendra Pradhan ban tuklar lang halor san tylli ki project ba la mang hapoh ka Pradhan Mantri Jan Vikas Karyakram (PMJVK) na bynta ka North Eastern Hill University (NEHU), Tura Campus, Meghalaya, kaba dang ban pyntreikam. Ka song pisa ba T.35 klur la pynlait da ka Ministry Minority Affairs ban pyntrei ia ki jingtei ba donkam.

“Kine ki project ki long kiba kongsan ym tang ia ka University hynrei ia ka thain Ri-lum Garo baroh kawei ban pynbiang ki jingtei ki jaka pule Higher Education na bynta ka jingmyntoi ki samla pule bad ka imlang sahlang” ula ong.

Lah ban kdew ka Ministry Minority Affairs ka la ai jingmut kham shwa ia ka CPWD kum ka Agency ban pyntrei ia ka project ha ka jingialang ha ka 14 tarik Risaw, 2025.

U Myntri Rangbah ula pynpaw ia u Myntri ka Sorkar Pdeng halor ka Captain Williamson Sangma State University (CWSSU) kum ka Greenfield Development Model bad ban ai jingiarap song pisa ia ki jingtei ba donkam ha ka pule puthi, ki Laboratory, Hostel bad ki prokram ai jinghikai ia ki nonghikai.

U la kyrpad ruh ia u Myntri ban ai jingiarap song pisa sha ka CWSSU hapoh ka MERU (Multi Disciplinary Education and Research University) Vertical jong ka PM-USHA, kaba ki University ka Sorkar Jylla ki lah ban ioh grant ba haduh T.100 klur.