Bitar ka RBDGCSA bym ïoh kam ki Kontraktor, 3 tarik yn iaid paidbah ha ophis DC

Ka synjuk ki nongtrei kontraktor ba la tip kum ka Ri Bhoi District Government Contractor and Supplier Association (RBDGCSA) ka la bitar halor ka jingleh bym suid niew ka sorkar jylla, bad ki la rai ban iaid paidbah sha ophis u Deputy Commissioner ha ka 3 tarik Jylliew ban ai dorkhas halor ki mat jingdawa.

Ka kynhun jong RBDGCSA, hadien ka jingshah ktah ka jakpoh jong ki namar ka jingbym ioh kam ioh jam na ka sorkar jylla, ki la pynlong da ka jingialang ban shong pyrkhat ha Nongpoh bad ban shim ruh ia ka rai halor kane ka mat.

La wan ban ia donlang ha kane ka jingialang da ki nongialam ka RBDGCSA u Bah Plielad Tiewsoh kum u President, Bah CL Masharing Working President, la shim bynta ruh da u Bah Malcom Langi, President ka Khasi-Jaintia Contractor Association nalor kiwei kiwei.

Haba kren sha ki Nongthoh Khubor, u Bah Plielad Tiewsoh bad u Bah CL Masharing, ki la pynpaw ba kum ka kynhun ki nongtrei contractor na Ri Bhoi District ki dap shisha da ka jingsngewkhia halor ka jingbym phiah kam da ka sorkar jylla watla shibun ki kam pynroi kiba la kot da ki spah klur la shu aiti beit tang ha kawei ka company.

Ki la iathuh ruh, ba kane ka jingleh shilliang jong ka sorkar jylla ha kaba ia dei bad ka jingbym aikam sha ki local contractor ka la ktah ia ka jakpoh jong kiba bun ki longiing kiba im bad bsa lyngba ki kam contract, kaba long ruh kum ka jingiuhroit ia ka hok iohkam iohjam jong ki local contractor kiba lah ban trei ia kino kino ki jait kam.

Shuh shuh ruh, ki la pynpaw ba nalor ka jingeh ban iohkam, kum ki contractor ki la hap ban mad ruh ia ka jingeh kaba khraw na ka jingpynslem ban ioh ia ka pisa kaba ki la dep ban pyntrei ia ki kam ki jam ha ki tnad treikam sorkar bapher bapher ha kaba kim iohlad ruh wat ban siew ia ki ram ki shah ba la shim ha kaba pyntrei ia ki kam ba la dep, kumta halor shibun ki mat jingdawa, ka kynhun ki nongtrei contractor kin mih paidbah ha ka 3 tarik Jylliew ban leit buh da ka dorkhas sha u DC bad lada ka sorkar ka dang mynthi kim banse ban shim pat da ki lad ba tyngeh.