Plie u Symbud Myntri ïa ka surok Dr. Friday Lyngdoh Road

Kum ka dak ban kynmaw burom bad ban pynsahnam ia u MLA barim ka Mawkhar Constituency u Dr Friday Lyngdoh (Ba la khlad noh), ha ka sngi saitjain u Symbud Myntri Rangbah ka Jylla uba khmih ia ka Tnad PWD (Roads & Buildings) u Bah Prestone Tynsong, ula plie paidbah ia ka jingthoh kaba la ai kyrteng da ka Dr Friday Lyngdoh Road kaba la sdang na ka shnong Mission Compund, Wahthapbru shaduh Jaiaw Pdeng. Ha kane ka jingplie la wan ban iadonlang ki khun bad ki bahaiing bahasem jong u (L) Dr Friday Friday Lyngdoh, ha kaba la iadonlang ruh u MLA ka North Shillong u Bah Adelbert Nongrum, u MDC ka Mawkhar Pynthorumkhrah bad Chairman ka KHADC u Bah Strong Pillar Kharjana, ki ophisar ka tnad PWD, ki nongialam shnong jongka Dorbar Shnong Mission Compund, Wahthapbru, Jaiaw Pdeng, Mawkhar bad kiwei kiwei ki shnong kiba don marjan.

Hadien ba la dep ban plie ia ka jingthoh ne Signboard la pynlong pat ia ka jingialang ha ka Communitty Hall jong ka Mission Compound bad ki nongkren kiba la ai jingkren kila pyrto ia ki kam kiba la leh da u Dr Friday na ka bynta ka imlang sahlang bad kila ong ba udei u rangbah uba ieng na ka bynta ki paidbah bad uba bat ruh ia la ka nongrim kaba u ieng.Katba u Bah Prestone Tynsong haba kren kum u Kongsan ula ong ba ula ioh ia ka lad ban iatreilang bad u Dr Friday Lyngdoh hapoh ka seng Congress naduh u snem 2003 haduh 2013 bad u Dr Friday ia u hi ula long kum u nonghikai bad u nongialam lynti bad u long kumne kumba u long mynta kadei na ki jinghikai kiba u ioh na u Dr Friday Lyngdoh.Ula iathuh ba ha ka por ba ula leit ryngkat bad u Dr Friday sha Delhi ban leit iakynduh ia ka Sonia Gandhi, kaba phylla ka long ba ym shim la donkam ban bud ia kino kino kyndon ban iakynduh ia ka heh nongialam ka seng Congress, namar ba ka Sonia kala wan hi dalade ban wan shaw ia u Dr Friday Lyngdoh naduh na varendah.

U Symbud Myntri Rangbah ula ong ba u Dr Friday udei u rangbah uba ieng bad ai jingshakri ia ki paidbah bad u bym ju don ia kino kino ki nongshun bad ula kyntu ia ki khun bad ia ki bahaiing ba kidei ban bud ia ki nuksa jong u Dr Friday Lyngdoh. Ka jingainam ia kane ka surok ka long kum ka dak ban pynsahnam ia u MLA barim ka Mawkhar Constituency u Dr Friday Lyngdoh uba long ruh u Tymmen Basan jong ka Balang Presbyterian Mawkhar, uba la noh synniang bha sha ka imlang sahlang bad ia ka jylla baroh kawei.