Kut ka jingai por, byrthen tur Secretariat ki Sengbhalang

Ki kynhun sengbhalang bapher bapher jong ka thain Mawsynram C&RD Block kila byrthen ba kin mih paidbah ban wan tur sha Secretariat, hadien ba ka jingai por jong ki ar taiew ia ka sorkar jylla ka la kut ha kine ki khyndiat sngi.
Ki kynhun Sengbhalang kiba kynthup ka Hynniewtrep Nationl Youth Front (HNYF), Hynniewtrep Youth Council (HYC) bad ka Federation of Khasi Jaintia & Garo People (FKJGP), kila dawa ba ka sorkar jylla kadei ban weng noh mardor ia ka kompeni SAI Computer Pvt.Ltd kaba pyniaid ia ki kam sam bording ha ka thain Mawsynram-Ranikor.
Haba kren sha ki lad pathai khubor, u Chairman ka kynhun sengbhalang u bah Tyngshain Ronghang, ula ong ba ka jingdawa jong ki na ka sorkar ban weng ia katei ka kompeni kadei namar ba ka trei torti bad ka leh donbor ia ki paidbah ha ka kam bording
“ Ka jingtreikam kane ka kompeni ka long kaba torti bad leh donbor ha ka ktien ka thylliej bad naduh ba shimti kane ka kompeni ka bai thang bodding ka la kiew shaba palat pud haduh ba ki paidbah nongshong shnong ha ki lai tylli ki Block ki mad jingeh ban siew,” ula ong.
U Bah Tyngshain ula ong ba kum ki sengbhalang ki pyrshah jur bad ki dawa ba ka MeECL kadei ban shimti hi noh ban pyniaid ia ka jingsam bording ha kane ka thain.
Katkum ka jingong u bah Tyngshain, ki kynhun sengbhalang ha ka 11 tarik Jymmang, kila ai por ar taiew ia ka sorkar ba kadei ban pyndam noh ia ka soskular ba la iateh bad kane ka kompeni. Hynrei haduh mynta ym shym la ioh ia kano kano ka jubab bad ula shu kular ba un leh katba leh.
“ Ngim pdiang ia kane ka kompeni bad ngi kwah ba ka sorkar kadei ban pyndam noh ia ka jingiateh soskular bad kane ka kompeni. Hynrei kaba sngewsih ka long ba mynta la palat ia ar taiew ruh, u Myntri ka tnad Bording um shym la ai kano kano jubab,” ula ong.
Ha kajuh ka por, ula pynpaw ka jingsngew lyngoh ba ka sorkar ka leh mynthi bad kam shym la sngap ia ka jingdawa jong ki paidbah jong ki lai tylli ki thain.
“ Lada ka sorkar kam ai kano kano ka dak ka shin, ngim banse ban wantur sha Secretariat,” ong u Chairman ka kynhun sengbhalang.