Pynrem ka NESO ba shah pyniap 6 ngut ki Naga, dawa ia ka sorkar pdeng ban pynkut noh ka jingiakynad ha Manipur

Ka North East Students’ Organization (NESO) ka la pynrem jur bad pynpaw ka jingsngewkhia halor ka jingleh riewkhlaw ki runar ban pyniap dusmon ia hynriew ngut ki rangbah Naga kiba dei na ka shnong Konsakhul.

Ia ka met jong kine ki hynriew ngut ki rangbah la lap ha ka 10 tarik Jylliew, 2026 hadien ba ki la shah rahbor na shnong Leilon Vaiphei ha ka 13 tarik Jymmang.

Ka NESO ka la pynpaw ka jingsngewtriem halor ka khubor ba kine ki rangbah ki la shah pynshitom hashwa ba kin shah pyniap. Ka jingpyniap dusmon ki runar ia kine ki mynsiem, ka la pynkyndit ia ka jingiatiplem jong ki paidbah ka thain Lammihngi baroh kawei.

Ka seng ka la phah ruh ia ka khubor sngewlem sha ki bahaiing hasem jong kine ki rangbah kiba la khlad bad sha ki paidbah ka shnong Konsakhul.

Na ka liang ka NESO ka dawa ba dei ban pyllong ia ka jingtohkit kaba khuid kaba shai halor kane ka kam runar kaba shyrkhei bad dei ban ai ka jingbishar kaba hok bad ban kem ia kino kino ki briew kiba donkti ha kane ka kam pyniap namar ka jingbym lah ban shimkhia ban kem kan nang pynshlur ia ki ban leh ia kane ka kam runar ka kam pyntriem.

U Chairman ka NESO u bah Samuel B. Jyrwa ula ong ba ha kine ki lai snem, ka NESO ka la ialeh ban wanrah ia ka jingshongsuk ha ka jylla Manipur bad ka la iai kyntu biang ia baroh ki nongshong shnong bad ki bor ba halor ba kin pyntikna ban ai ka jingiada ia ki paidbah bad ki dei ban shim ia ki sienjam ban pynkut noh ia kane ka jingiakajia ha katei ka jylla. Hynrei watla ka NESO ka la phah ia ka jingkyntu bad watla la pynbiang da ki hajar ngut ki kynhun pahara ha ka jylla, ka jingiakajia ka dang iai bteng haduh kine ki sngi.

Ula ong ba ka NESO ka la buh jingkylli ia ka sorkar India, kumno hadien palat lai snem ka jingiakajia bad ka jingbuh ia ki shipai pahara, ym don tang uwei ruh u ban shah kem.

Halor kane, ula ong ba ka NESO ka la pynpaw ka jingsngewkhia halor ki jingkynnoh ba shah liang bad jingdonkti lang ki bor pahara ha kine ki jingiakajia. “Lada don kino kino ki jingleh shilliang da ki bor pahara kiba dei ban pynneh ia ka jingshongsuk shongsain bad ban iada ia ki paidbah, ki dei ban shah pynshitom bad shah pynngat ha ka ain.

Shuh shuh ka NESO ka la dawa ba ka sorkar India ka dei ban shimkhia ban wanrah biang ka jingshaniah ia ki paidbah bad dei ban pynkut noh ia ka jingiakajia ha Manipur.

Ula pynpaw ba na ka liang ka NESO ka ieng skhem bad ki paidbah ka Konsakhul Naga bad baroh kiba la duh ia mynsiem kidei ban ioh ia ka jingbishar kaba hok.