Ai por ki Waheh Kur 15 sngi ia ka JHADC ban ithuh ia ki Sengkur

Ka Dorbar ki Waheh Kur Ri Jaiñtia kaba la long mynta ka sngi ha Iungwalieh ka dorbar shnong Chilliangraij ia kaba la wan shim bynta da ki President, Secretary bad kiba mihkhmat jong ki Kur bapher bapher na ka bynta ban iakren halor kiba bun ki mat. Kane ka dorbar ka la iakren ruh halor ka shithi kaba ki la dep ai dang shen sha u CEM ka JHADC u Thombor Shiwat ha kaba ki la ai por ia u ban jubab lyngba ka jingthoh lane ban khot iakren hapoh ka 10 tarik mynta u bnai June na ka bynta ban shna aiñ ne ban ithuh noh da ka aiñ ia ki Kur ki Jait ba shim na ka kmie, kumjuh ruh ban ithuh ia ki sengkur bad waheh kur.

U President ka Dorbar ki Waheh Kur Ri Jaiñtia u Khroo L Pariat u ong, ia ka  jingthoh la ai naduh 2 snem mynshwa nalor ki jingiakren jingleit kynduh hynrei ki leh mynthi. Naka liang ki nongialam u ong ki sngewdiaw bha namar ba ha ka jingiadei bad kane don ka aiñ ban buh ryntih ne ban ithuh ia ki kur katkum ka sixth schedule. Lyngba kane ka dorbar ki la shim ia ka rai ban  ai por biang sa 15 sngi kata naduh ka 15 tarik jong une u bnai June haduh 30 tarik, khnang ba u CEM ryngkat ka EC jong u kin shimkhia wanrah noh  ka aiñ ban ithuh ia ka kur ba ai jait sha ka kmie lem bad ki sengkur ki waheh kur ba don hapoh u pud ka district council.

Bad hadien ba la dep pynskhem shwa ia ki kur ba ai jait sha ka kmie ki kyntu ban ithuh pat sa ia kiwei  ki jaitbriew. Bad lada hapoh kine ki 15 sngi ruh kim leh ei ei, ki ong ba ki lah ban mih madan halor kane ka mat jingdawa.