Haduh 54 sien ai snam u Andreas, kyntu ia ki samla ban wan shakhmat

U Samla Andreas Marweiñ uba dei ruh u President ka Meghalaya Blood Donor Organisation (MBDO) ula iathuh ba ula dep ban ai snam haduh 54 sien bad u la pynshlur ruh ia kiwei ki para samla ba kin long kiba kylluid mynsiem ban ai snam na ka bynta ban pynim biang ia ki mynsiem ba kordor. Ia kane u samla Andreas ula pynpaw haba ai jingkren ha ka jingialang jong ka Federation of Khasi Jaintia and Garo People’s (FKJGP) kaba la pynkup burom ia ki samla ba wan shakhmat ban ai snam sha kito kiba donkam snam kyrkieh.

Lah ban kdew baka FKJGP haka 13 tarik Jylliew kala pynlong iaka jingai snam ei kum shi bynta ban rakhe ïa ka sngi synniang snam lane ka World Blood Donor Day 2026. Haka World Blood Donor Day, ki nongïalam ka FKJGP ba kyntup naduh ki nongïalam ki la leit ban ai snam ha ki ar jaka pynlang snam kata ha Pastuer Institute Lawmali Shillong bad North Eastern Indira Gandhi Regional Institute of Health and Medical Sciences (NEIGHRMS).Haba kren ha ka jingialang pynkup burom, u Samla Andreas u la ong “Ka snam ka long ka jingim, ka shi unit ka snam ba ngi ai ka lah ban pynim ia lai ngut ki mynsiem briew bad lada ngi ai lai unit ka mut ngi la pynim 15 ngut ki mynsiem briew.”

U Samla Andreas ula ai ka jingïaroh ia u nongialam ka FKJGP u Bah Dundee Cliff Khongsit uba la shim ia ka bynta ban ai snam bad ban pyni nuksa sha kiwei, “Lada dalade ngi ai snam, ngi sngewskhem ban pynshlur ia kiwei ruh ban ai snam” u la ong. Ula ong ka jingai snam ym tang ba ka pynim ia kiwei ki mynsiem briew, hynrei ka pynlong ruh ia ka met jong u nongai snam ban koit ban khiah, namar kata u la pynshlur ia kiwei ba kim dei ban artatien ban ai snam.