Plie u MR ia ka Boarding ba thymmai ka ka skul Pine Mount

U Myntri Rangbah ka Jylla u Conrad K Sangma ula plie ia ka Boarding Building thymmai ka skul Pine Mount ha ka jingiadonlang u Myntri ka Pule Puthi u Bah Lahkmen Rymbui, u Myntri ka Tnad Animal Husbandry & Veterinary u Bah Sanbor Shullai bad kiwei.

U Conrad ula pynkynmaw ha ka por ba u leit sha kane ka skul ha u Risaw 2022 da kaba ong, “Ha ka por ba nga wan sha ka skul ha u 2022, Nga la iakren bad ki khynnah pule bad la iohi markhmat ia ki jingeh ba ki mad. Ka jinglong jingman ka hostel kaba la ktah ruh ka pule puthi ki khynnah”.

Da kaba shimkhia ia ki jingeh jong ki, u Myntri Rangbah ula bthah ban leh eiei mardor bad kular ia ki khynnah pule ba ia ka Boarding Hostel yn tei thymmai. Haba wan biang sha campus hynne ka sngi, ula pynpaw ia ka jingsngewhun ban iohi ba ki jingkular ki la urlong.

U Myntri Rangbah ula iai ban ba ka pule puthi ka dang long ka kam ba hakhmat eh bad ka jingpynbha ia ki jingtei ka dei ka sienjam ba kongsan ha kaban pynthikna ia ka jingmih ba kham bha na ki jingpule bad ka ong ba ki jingkylla kiba don jingmut kin ym wan jia tang ha ka shimiet hynrei ka donkam ia ka jingpyrshang kaba iai bteng, ka jingkut jingmut bad ka jingshimkhia ia ki jingdonkam jong u paitbah.

“Ki jingkylla ki shim por, hynrei kaei kaba kongsan ka long ba ngi leh ia ki kam haba ngi iohi ia ki jingdonkam. Kawei ka sienjam kaba rit ruh ka long kaba kongsan. Lada ngi sngap, jubab, bad trei khlem sngeh, ngi lah ban wanrah ia ka jingkylla kaba shisha” ula ong.

U Conrad ula pynlait ruh ia ka prokram “She Thrives”, ka sanitary pad vending machine kaba don bad ki sanitary pad, kaba thmu ban kyntiew ia ka khuid ka suba bad ka burom ki khynnah skul kynthei ha ba ki poi jingpoi bad kane ka prokram ka long shibynta na ki jingpyrshang ban weng ia ki jingeh kiba mad na ka sngi sha ka sngi da ki khynnah kynthei ha ki skul.

Ula ong, ba ia kane ka prokram yn sa pyntreikam ha baroh kawei ka Jylla ban pynthikna ba man ki khynnah kynthei kin ioh ia ki jingdonkam ha ka jingleh khuid.

Haba iakren markhmat bad ki khynnah skul, u Myntri Rangbah ula jubab ia ki jingkylli haba iadei bad ki kabu iohkam iohjam bad ka lawei jong ki khynnah mynta. Ula batai ba katba ka jingdon ki kam Sorkar ka long kaba duna bha, ka Sorkar kala thaw ia ki policy bad ki prokram ban thaw ia ki lad ki lynti lyngba ka jingsengkam sengjam bad ka jingkiew ha ka kam shimet.

“Ngi dei ban sngewthuh ia ka jingshisha, man la u snem da ki hajar ngut ki samla ki rung ha ka jylli wad kam, hynrei tang khyndiat tylli ki kam Sorkar ki don. Kumta, ka lawei ka shong ha ka sengkam lajong, ka buit treikam thymmai bad ki kompani shimet” la pynkut u Myntri Rangbah.