Khang tala ka KSU ia ka Mandir ba shna beain ha ophis CBI

Ka Khasi Students’ Union (KSU) Shillong Mihngi Circle hynne ka sngi ka la leit ban khang tala ia ka Mandir ba shna beain hapoh ka ophis jong ka Central Bereau of India (CBI) bad ka la ai por shi taiew ïa ki bor ba dei peit ban pynpra ia katei ka mandir.Ka seng hapoh ka jingïalam u Assistant Organising Secretary ka Central Executive Council (CEC), u Samla Jeremiah Pohthmi hynne ka sngi ka la ïakynduh ruh ïa u DIG ka CBI halor ka jingshna beaiñ ïa  ka mandir hapoh kane ka ophis sorkar. Katkum ka kyrwoh khubor na ka seng, la ong ba ha ka jingïakren bad u heh ophisar ka CBI, ka lah mih ka jingïania bad ka jingïatai kaba jur hapdeng ki dkhot ka seng bad ki bor pyniaid ophis. Hadien ba ka jingiakren kam shym lah ban poi shaei shaei, na ka liang ki dkhot ka KSU ki lah pynpaw ïa ka jingsngew bitar da kaba khang tala shi syndon ïa kane ka mandir.

Na ka liang u Asst. Organising Secretary ka KSU CEC, U Samla Jeremiah Pohtmi u la ong ba tang ha kine ki snem ba lah dep na ka liang ka KSU Shillong Mihngi Circle ka la leit ïa kynduh ïa ki heh ophisar ka Ophis CBI ban pynsngew halor ka jingtei beaiñ ïa ka Madir Hapoh katei ka ophis Sorkar. Na ka liang ki heh Ophisar katei ka Ophis ha kito ki por hadien ba ki lah ïoh ban ïa kren bad ki Nongïalam, ki lah ai ka jingpynthikna ba kan ym don shuh ka jingtei ïa ka mandir hapoh katei ka Ophis. Hynrei tang ha kine ki khyndiat sngi, ka seng ka la ioh jingtip ba katei ka Madir ka la sdang iaid shait shait biang ka jingpyntrei ban tei ïa ka. Na ka liang ka seng hadien ba ka la ïoh jingtip ïa kane ka leit jurip bad  ïohi ba ka jingtei ïa kane mandir hapoh kane ka Ophis ka lah jan dep. Hadien kane ka seng ka la khang tala shi syndon ïa  kane ka Mandir.

Ha kajuh ka por ka seng ka lah maham bad ai por shi taiew ïa ki bor ba dei peit ban pynpra ne pynduh noh syndon ïa kane ka mandir hapoh ka ophis sorkar. Ka seng ka maham ruh ba lada kim leh eiei hapoh kane ka por ba la buh, ka seng ka lah maham ba kan sa shim da kiwei pat ki sienjam ba kham eh halor kane ka mat.