Ka VPP ka iuh roit ia ki bor synshar tynrai lyngba ka Land Ceiling Act: Dr OS Jyrwa

U Kyrtong ka UDP ha ka elekshon MLA ba la dep na Mawryngkneng bad u Kyrtong shimet ha ka ilekshon MDC u Dr OS Jyrwa ula kynnoh ba ka seng Voice of the People Party (VPP) kaba ialam ia ka Executive Committee ha Khasi Hills Autonomous District Council (KHADC) ka la iuhroit ia ka bor jong ki jaka synshar khaddar tynrai da kaba wanrah thymmai ia ka ain kaba ia dei bad ka khyndew ka shyiap.

Haba kren ha ka jingialap ilekshon na ka bynta u kyrtong ka NPP ha ka ilekshon MP shiteng samoi, u Dr DRL Nonglait ha Mawryngkneng, u Dr Jyrwa ula ong, ka jingtyrwa ia ka Land Bill bad Land Ceiling Act ka dei da ka jingthmu ban iuhroit bad buh sharud noh ia ki Rangbah Shnong, Dorbar Raid bad Dorbar Hima.

“Haba ngi kylli balei ki la weng ia ki Rangbah Shnong, Dorbar Raid, Dorbar Hima, ki la ong ba um donkam shuh lada ki la pyntreikam ia ka Land Ceiling Act namar ba yn pyntreikam beit noh da ka District Council,” ula ong.

U Dr Jyrwa u la kdew ia ka Clause 16, ba lah dep ban pynduh noh ia ka jingiasyllok bad ki khlieh nongsynshar.

“Kumno phin ong, ba phim shim la pynduhbor haba phi lah dep ban weng noh ia ka Clause 16? Katei ka kyndon kala dep kren shai ba lada pyntreikam ia ka Land Ceiling Act kadei ban don ka jingiasyllok bad ki nongialam shnong, hynrei kine kila kwah ban iaid lait noh ia katei” ula ong.

Ula ong, man la ki shnong ki don ia la ka rukom synshar khaddar tynrai kumta kam long kaba lah satia ban shu pynjari lut kumjuh da kawei ka ain.

“Ha Mawryngkneng, ka lah don lypa kawei ka kyndon ain ba ka jingdie jaka sha ki briew kiba nabar kadei kaba yn ym shah satia. Kane kadei ka rukom synshar khaddar tynrai ka shnong. Ka jaka kadei jong ka shnong, Raid bad Hima, hynrei ki, kin ialeh ban knieh jubor ia kane ka jinglongtrai. Kane ka long kaba bakla jur” ula ong.

U Dr Jyrwa ula kynthoh tyngeh ruh ia ka seng VPP kaba la kular shwa ka elekshon ban weng noh ia ki Toll Gate ne ki khyrdop lum khajna.

“Hashwa ka ilekshon MDC, kila ong ba yn ym don shuh ki khyrdop lum khajna lada ki wan ha ka bor. Mynta ki lah don ha ka bor hynrei ki khyrdop lum khajna kila nang bun. Kito kiba ngi lah jied kila kylla long ki nonglum ha kitei ki khyrdop” ula kynnoh.

Da kaba ong, ba ka ilekshon MP kadei ka kabu ban ai ia ka rai pyrshah ia ka jingialam hapoh ka KHADC” u Dr Jyrwa ula ong, “Ha ka kam synshar paitbah, ka bor ka shong ha ki paitbah. Phi long halor eh, phi dei ki nongthep vote, phi ai ia ka bor bad phi knieh noh ia ka bor”.

Haba pynshai halor ka jingkynnoh ba lah shu siew da ka pisa ia ki paitbah ban iashimbynta ha ki jingialang jong ka NPP, ula ong, “Lada kam don ka mynsiem, wat lada phi ai pisa ruh, ngan ym wan sha ka jingialang. Ki paitbah ka Mawryngkneng kila wan kadei namar ba ki ieid ia u Dr Nonglait.”

Pynlong ka IRDAI’s State Insurance Plan ia ka jingialang ka State-Level Insurance Committee

Shillong, Nailur 05: Ka Tata AIG General Insurance Company Limited, kawei na ki kompany insurance ba ha khmat eh na ka bynta ka Nagaland hapoh jong ka Insurance Regulatory and Development Authority of India’s (IRDAI) State Insurance Plan (SIP), ka la iashim bynta ha ka sien ba nyngkong ha ka jingialang jong ka State-Level Insurance Committee (SLIC) ba la long ha ka jylla.

Ia kane ka jingialang la pyniaid da U Kesonyu Yhome, IAS, uba long u Finance Commissioner, ka sorkar Nagaland, ha kane ka jingialang la iadonlang ki heh ophisar jong ka IRDAI, Tata AIG, ki tnad sorkar bad ki kompany insurance ban iakren shaphang kumno ban pynkhlain ia ka jingrung jong ka insurance bad nang pynbun ia ka jingdon ki briew kiba leh insurance ha kylleng ki bynta jong ka Nagaland.

U Yhome u la pynpaw halor ka jingdon jingma jong ka jylla na ka daw jong bun jait ki jinglynshop ka mariang, ka jingjur u jumai bad ka jingtwa khyndew ha kaba kum kine kiei kiei donkam bha ia ka jingdon jong ka insurance.

U la kyntu ia baroh ki tnad sorkar ba ki dei ban peit ia ki jait insurance aiu ba donkam ba kynthup naduh ki kali, ha iing hasem, ki kam karkhana ne MSME, ki jingdon jingem bad kiwei kiwei pat ki jingma bad dei ruh ban peit ia ki lad ki lynti bad pynrung ia ka Nagaland hapoh jong ka Pradhan Mantri Fasal Bima Yojana (PMFBY) scheme bad ban pyntikna ba ka jylla kan ioh ban kynjoh sha ka thong jong ka ri kata ka “Insurance for All by 2047” ynda ba ka ri bad ka jylla kan ioh ia ka Viksit Bharat bad kumjuh ka Nagaland.