Ki ‘Social Media’ ki tuh ia ka jingtip shimet u briew ban ialam bakla ia ki paidbah”

Ka kompeni Signature and Fable hynne ka sngi ka la pynsngew sha ki paidbah halor ka jingjur ka jingmih ki rynsan Social Media kiba ialam bakla ia ki paidbah na ka jingbun ka jingleh ia ki Artificial Intelligence (AI).Haba kren sha ki lad pathai khubor u Chief Legal Officer ka kompeni u bah Napolean S. Mawphniaw ryngkat ka jingdonlang u Chief Executive Officer u John elijah Gomar lem kiwei de, ula ong ba bun ki rynsan Social Media kum ki Instagram, ki Facebook, Youtube, ki ap tang ban ioh ban tuh ia ka por jong ki briew, ki tuh ia ka jingtip kaba dei shimet jong ki bad ka ialam bakla ruh ia ki briew.

Ula ong ba ha ka pyrthei AI bad ka pyrthei stad mynta, ki briew ki pynsngewthuh bakla ia ka tynrai jong ka jylla. Hynrei kane ka rynsan Signature and Fable kan ai jingtip ban pynshai sha ki paidbah ia kiei kiei kiba lah ban pynsniew ia ka longbriew manbriew.U bah Napolean ula ong ba ki don bun ki App ha ki rynsan Social Media kim bym lah ban ioh ia ka jingshaniah. Hynrei ha kane ka rynsan jong ki, la kren shaphang ka jingshaniah bad ka tynrai kaba shisha. “ Ka Signature and Fable kam dei ka rynsan Social Media, kam dei ka iew iadie iathied bad kam dei ruh app kaba pynshang ban pynsuk ne pynphriang ia kino kino ki jingjia. Kane ka Signature kadei ka rynsan kaba lah ban iada ban aibor ia ki paidbah ha kane ka juk stad mynta,” ula ong.

Ula pynpaw ka jingsngewkhia ba ka jingma mynta ka long namar ka daw ka Internet bad ka jingbun ki jingleh AI ha kaba bun ki briew ki ngeit kulmar namar ka AI bad kam don shuh ka jingiada ia ka jingtip shimet jong ki.