Dawa ka SRS ban siew bailutksan ia kiba iap shah bat bording

Ka Synjuk ki Rangbah Shnong Ri-Bhoi Mihngi ka la dawa ïa ka MeECL ba kan siew ïa ka bai lutksan sha ka longïing kaba la duh noh ïa lai ngut ki khun ha ka jingjia kaba sngewsih.Naka liang ka Synjuk ki Rangbah Shnong, Ri-Bhoi Mihngi mynta ka sngi kala leit ban ïakynduh syndon ïa u Deputy Commissioner ka Ri-Bhoi District u Dr Abhishek Saini ban aiti da ka jingthoh ha kaba ïadei bad katei ka jingjia ba sngewsih bad ka sorkar ka dei ban pynkloi ïaka jingsiew ïaka bai lutksan sha ki longiing ba ngat ha katei ka apot.Haba kren sha ki lad pathai khubor hadien ka jingïakynduh bad u Deputy Commissioner ka Ri-Bhoi District, u Chairman ka Synjuk, Bah P.B. Sylliang, ha ka jingdonlang u General Secretary Bah Ailong Pariat lem bad kiwei ki dkhot, u la ong ba tang mar ïa ïoh jingtip shaphang katei ka jingjia kaba sngewsih, ka Synjuk ka la leit mar mar sha katei ka shnong ban pynpaw ïa ka jingsngewlem bad ban ai mynsiem ïa ka longïing kaba la mad ïa katei ka jingjia kaba sngewsih.

U la ong ba hadien ka jingwan sngewlem, ka Synjuk ka la leit ban ïakynduh syndon ïa u Deputy Commissioner bad aiti da ka jingthoh, ban dawa ba ka MeECL ka dei ban siew ïa ka bai lutksan sha ka longïing jong kitei ki lai ngut ki heprit kiba la khlad. U la ban jur ba katei ka bai lutksan kam dei satia ban ïa peiñ ïa ka jingpang mynsiem jong ka longïing, hynrei ka long ka jingïarap kaba donkam ha kane ka por jong ka jingeh. Ka Synjuk ka la pynpaw ruh ïa ka jingsngewkhia halor ka jingbym shimkhia ïa ki jingujor namar katkum ka jingtip jong ka Synjuk, u Rangbah Shnong ka shnong Umtangling u la leit ban ujor ïa katei ka jingeh naduh ka sngi Nyngkong, hynrei ym shym la don ka jingshimkhia kaba kloi ban weng ïa ka jingma.

Namarkata, ka Synjuk Ki Rangbah Shnong Ri-Bhoi Mihngi ka la kyrpad ïa u Deputy Commissioner ba un bthah ïa ki ophisar ba kin shimkhia bad jubab kloi ïa kino kino ki ujor kiba ïadei bad ka jingshngaiñ ki nongshong shnong. Ha kajuh ka por, ka la kyntu ruh ïa ka Sorkar bad ka MeECL ba kin pyndep noh ïa ka jingai bai lutksan khlem da pynslem, bad ba kum kine ki jingjia ba sngewsih kim dei shuh ban dang jia nangne shakhmat.