Hadien ka jingthwet ba kynnoh batbor Leit pyndem u Jonathan ha ki pulit Laitumkhrah

U Jonathan L Pachau 21 snem ba la shah kynnoh donkti leh be-ijot bad kynshlein ia ki khynnah kynthei, hynne ka sngi ula leit ban pyndem ia lade ha khmat u Officer Incharge ka Laitumkhrah Police Station.

Katkum ka kyrwoh na u Superintendent Police ka East Khasi Hills u Bah Vivek Syiem ula pynpaw ba u Jonathan L Pachau u dei ba donkti ha ka Laitumkhrah PS Case No. 100/2026 u/s 3/4/11/12 POCSO Act bad Laitumkhrah PS C No. 94/2026 U/s 64(1) BNS bad hynne ka sngi ula leit pyndem hakhmat u Officer in Charge ka Laitumkhrah PS bad la kem ia u bad yn rah sha iingkashari bishar.

Kum ban shu pynkynmaw ha ka 6 tarik u Naitung, ka khubor ka la saphriang ha rynsan social media bad kynnoh ba utei u samla ba donkti leh be-ijot bad kynshlein kynthei bad ki pulit ki la shimkhia ban bud dien ia une u briew.

Katei ka jingkynnoh kam shim la kut tang ha ka rynsan social Media hynrei ka la pynlong ruh ia ki ar ngut ki khynnah kynthei ban leit ujor da ka ejahar pyrshah ia u Jonathan bad kumta hadien kane ki pulit ki la pynmih da ka ‘Look Out Notice’ ha ka ri baroh kawei ban pyntip ia ka jingphet rieh une u samla.

Ki pulit mynta kin iaid shakhmat ban pynlong ia ka jingtohkit ia u Jonathan ban pynshisha ia ki jingkynnoh kiba la mih ha ka rynsan social Media ba ula leh be-ijot bad leh kynshlein ia ki 8 ngut ki khynnah kynthei.

“Ngi la iakren bad katto katne ngut ki nongshah thombor hynrei ka dei tang lyngba ka phone. Mynta ngi la phone ia ki ban wan khnang ban ioh shim iaka Statement bad haka juh ka por ngi la kyntu iaki ban ujor daka FIR” la ong u SP ha kine ki khyndiat sngi kiba la dep.

Ula ong ba ki pulit ki dang pynshisha ruh ïa ki jingkynnoh kiba la saphriang ha ki rynsan social media.

“Ki jingthoh ha ki rynsan social media kim dei ki jingshisha. Ngim pat lah ban pynthikna ia ka jingshisha jong kata. Tang hadien ba ngi la bishar bniah ia ki briew bad shim iaka Statement ngin sa lah ban pynthikna lada ki dei ki nongshah thombor ne em” la ong u SP.