Ban pynkut ia ka jingthmu tih Uranium ha Meghalaya

Ka Sorkar Meghalaya ka la mynjur ban wanrah da ka Resolution hapoh ka iingdorbar ban pyrshah bad pynkut syndon ia ka jingthmu tih Uranium ha Jylla Meghalaya.Ia kane la pyntip da u Myntri Rangbah ka Jylla u Conrad K Sangma halor ki jingkynthoh ba la mih ha ki kot khubor dang shen ia ka jingthmu ban tih Uranium hapoh Meghalaya.Haba pynskhem ia ka jingpyrshah ban tih Uranium, u Myntri Rangbah ula pynbna ba ka Sorkar Meghalaya kan mynjur ïa ka Resolution ban pyrshah bad khang pyrshah ïa ka jingtih Uranium bad pynpaw ka Sorkar kam pat ju mynjur ban tih Uranium.

Ka rai jong ka Sorkar Jylla ban mynjur da ka Resolution ban pyrshah tih Uranium ka pynpaw ia ka jingkular ba skhem ka Sorkar ban weng ia ki jingsngewkhia ki paidbah halor ka jingktah kiba lah ban mih lada tih uranium. “Ka jingmynjur ban wanrah ia ka Resolution ban pyrshah tih Uranium kan pynshai ia ki paidbah ba ka Sorkar Jylla kam shah ban tih Uranium” la ong u Conrad.

Haba kdew ia ka jingwan dang shen jong u Myntri Sorkar Pdeng u Dr Jitendra Singh sha Shillong, u Conrad ula ong ba u Myntri Sorkar Pdeng ula pynshai sha ki lad pathai khubor ba ka Sorkar India kam pat shim satia ia kano kano ka rai halor ka jingtih uranium ha Meghalaya bad kane ka kam ka dang don hapdeng ka jingbishar. “Ka jingkren jong u ka la shai bha ba ka Sorkar India kam pat rai halor kane ka kam” ula bynrap.