Ka KSU kan ym kynran dien ban iakhun ia kiba thmu ban pynkylla ‘langiong ia ki para doh

U President ka Khasi Student Union (KSU) u Samla Raymond Kharjana ula ong ba ka KSU kam tieng ban pha ia la ka jingim bad kam kynran dien ban shim ia ka jingim ki mynder ri ba thmu ban pynkylla langiong ia ki para doh para snam jong ka ri bad ka jaidbynriew.

Ia kane u President ka KSU ula maham haba ai jingkren ha ka lyngkhuh sngi iap ba 191 snem jong u Paiem Tirot Sing ha ka jingialang ba la pynlong ha nongbah Shillong.

Haba kren ha kane ka sngi u samla Raymond Kharjana ula ong, ba ka KSU ka pynpaw ka jingsngewnguh ia ka rai jong ka Sorkar ban mynjur da ka Resolution ban pyrshah tih Uranium hapoh ka Jylla Meghalaya hynrei ula ong ba ka jingmynjur ia ka Resolution kam dei ka lynti kaba la kut halor kane ka mat.

U samla Raymond ula ong ba hadien ba ka seng ka sdang ban khylli biang ia kane ka mat, la shem ba kiba bun ki riew pawkhmat jong ka Jylla ki la sdang ban hiar sha ka thain Domiasiat, South West Khasi Hills ban pyntieng pynsmiej ia ki para doh para snam.

“Hooid ngi sngewthuh bad ngi iohi ba ka Sorkar kan mynjur ia kata ka Resolution hynrei kaba kongsan ka long ba ka Sorkar ka dei ban pynlong ia ka jingtih bniah ba balei kita ki riew shimet ki sdang ban shim ia ki jaka ha kitei ki thain” la ong u samla Raymond.

“Ka KSU kam tieng ban phla ia la ka jong ka jingim bad kam kynran dien ban shim ia ka jingim jong ki mynder ri kiba thmu ban pynkylla langiong ia ki para doh para snam jong ka ri bad ka jaidbynriew” ula bynrap.

Ula iathuh ba dang shen ka KSU ka la iakynduh ia u Myntri Rangbah bad ka la ban jur ba ka Jylla haduh mynta kam don kano kano ka ain ban tehlakam ia ka jingwan rung ki mynder ri hapoh Jylla.

“Ka la dei ka por ba ka Sorkar kan pyni ia kata ka jingshimkhia bad ka jingkitkhlieh namar kumba ngi ong ba ka jaidbynriew jong ngi ka dei kaba rit paid bad ngi don ha ka jinglong syier ioh ha kawei ka sngi, ngin shah tyllup bad jah noh na snieh ka pyrthei” ula ong.

U President ka KSU ha ka jingkren u pynpaw ruh ia ka jingsngew diaw halor ka jingslem ka Sorkar Pdeng ban mynjur ban pyntreikam ia ka Inner Line Permit (ILP) hapoh Meghalaya.

“Haba ngi iakren ia ka Resolution jong ka ILP, haduh mynta mynne ngi dang sah ha ka umdum. Nangne shakhmat ngin long kiba adkar, namar ngi la iohi ba la Pass ia ka Resolution na kawei ka por sha kawei pat hynrei ngim shym la iohi u soh jong ka jingjop wat hadien ba la Pass ia ka Resolution” ula ong.