Iakhih ka HFU ba hiar dor ki mar rep

Namar ka jinghiar dor ki mar rep khamtam u kubi ki nongrep hapoh ka lama jong ka Hill Farmers Union (HFU) ki la pynlong ka jingiakhih da kaba sam ei u kubi sha ki paitbah hynne ka sngi.

Kane ka jingiakhih ka kham pher bad ka HFU ka la wah ruh ka jingthoh “Ka jingsam ei kubi sha ki paitbah bad ka por kan sa poi ba ngi lah ban iehnoh ia ka kam rep namar ym ioh nong shuh ban rep ban riang”.

Haba iakren bad u President ka HFU u Bah Commander Shangpliang ula ong, u kubi mynta ki die ha ka dor T.2 shi kilo katba ka jingpynlut ban rep ka bun.

“Haba hiar dor palat ym don jingmut shuh ban leit die ha Iew. Kane ka long ban pynpaw sha ka sorkar bad sha ki paitbah ba nongrep ki mad jingeh” la ong u Bah Commander bad ula bynrap ka HFU ka dawa ia ka sorkar ban thaw ka Committee ban khein ia ka jinglut jingsep ha ka rep ka riang.

U President ka HFU ula ong, ki nongrep kubi ki hap ban pynlut T.10 shi kilo bad ki khmih lynti ban lah die ha ka dor T.11 shi kilo ba kin ioh nong lem T.1. Hynrei lada ka jingpynlut ka long T.10 katba ka dor die long tang T.2, ka sorkar ka dei ban siew T.8 ia ki nongrep ba kin ym duhnong palat. Kumta ka HFU bad dawa ia ka dorkar ban don ka Market Intervention Scheme na bynta baroh ki mar rep ha Jylla.

U Bah Shangpliang ula pynpaw bun ki nongrep ki don hapdeng ki jingeh nalor ban pynbiang ki jingdonkam ha iing kynthup ka bai skul, bai bam bad kiwei.

“Ki nongrep ki don haiing ryngkat ki khun ba hap ban kyrshan. Kumta ki mad jingeh ban pynbiang ia ki jingdonkam ha iing ha sem bad kyntu ia ka sorkar ban shimkhia mardor ban buh ia ka dor khnang ba ki nongrep kin duhnong” ula bynrap.