Pyrshah ka shnong Pynthorumkhrah ban tei Park T.25 klur ha madan Golflink

Watla ka madan Golf kaba ju ialehkai golf ka don hapoh ka shnong Golflink hynrei ka jingiadei hapdeng ka shnong bad ka bor pyniaid ka Shillong Golf Club kam long kaba biang.Ha ka jingiakren bad u Rangbah Shnong ka Pynthorumkhrah Golflink, u bah Michael Hek ula kynnoh ka bor pyniaid ka Shillong Golf Club, kam ju iatreilang ha kiba bun ki khep bad ka bor shnong khamtam ha ka jingai kam ai jam ia ki samla ka shnong, nalor ba ka pyrshang ruh ban pynthut ia ki nongshong shnong ban iaid ban ieng ha katei ka madan haduh ba ka shnong ka la hap ban tuklar.

“Haduh mynta ym don uwei u khynnah shnong ba ioh kam ioh jam ha katei ka jaka. Ka Shillong Golf Club ka shu pyndonkam ia ka shnong tang haba donkam bad hadien ki kyntait ia ka shnong. Namar kata ka shnong bad Club kam don ka jingiadei ba bha,” ong u Rangbah shnong.U Rangbah shnong ula kam ba ka jingdon ka golf course kam don eiei ka jingmyntoi ia ka shnong, ia ki khun samla ka shnong namar wat tang ia kiba khrong pisa, kiba ap security ruh ym ioh ki trai shnong. U la ong ba la iakren bun sien ban ai kam ai jam ia ki samla hynrei kim sngap eiei.Ula ong ba dei hadien ba tuklar ka bor shnong ba kim dei ban khrong pisa ia ki trai shnong kiba leit iaid kai ha katei ka madan. Katkum ka jingong u bah Micheal Hek, ka shnong ia mynta shipor kam kwah ban iatreilang bad bynrap ka don ka jingthmu ban shna ia ka Park ba T.25 klur hynrei ka shnong kam shym la ai ia ka NOC, namar ba 50 percent kin dei ki nongtrei jong ki bad 50 percent ia ki nongtrei ka shnong bad ki kyntait ban ai wat tang ia kawei ka madan futsal ba pan ka shnong.

Na ka liang u Rangbah shnong ula ong ba kan bha lada ka sorkar jylla kan shimti ban pyniaid hi ia katei ka golf course lyngba ka jingiakren bad ki trai jaka khnang ban ioh kam ioh jam ki samla bad kan ai jingmyntoi ia ki paidbah namar ba ka dei ka jaka jngohkai kaba khring bha ia ki briew. Ha kajuh ka por, ula iathuh ba mynta ka sorkar jylla ka la thmu ban bei pisa ban pyllong ia katei ka madan golf kaban iaryngkat kyrdan ha pyrthei. Watla ka shnong kam pyrshah eiei halor kane hynrei ula ong ba ka dei ban long kaba biang.