Pynkynriah ka Sorkar ïa ki 750 ki nongdie madan, yn ai mar T.20 hajar

Ka Sorkar Meghalaya ka la pynjur ïa ka jingpyrshang jong ka ban pynkynriah iaki nongdie jingdie madan ha Shillong, ha kaba 750 ngut ki nongdie jingdie madan kiba dei hok kila shah pynkynriah sha ki jaka bala ithuh kyrpang daka Sorkar lyngba ka Meghalaya Street Vendors (Protection of Livelihood and Regulation of Street Vending) Scheme, 2023.

Iaka jingpynkynriah iaki nongdie jingdie madan la leh daka tnat Urban Affairs ha ryngkat ka jingiatreilang bad ki bor district East Khasi Hills, kaba la thmu ban pynbiang ia ki jaka die jingdie ha ryngkat bad iada ia ka kamai kajih jong ki paidbah.

Dangshen ka tnat Sorkar kala dep ban pynkynriah iaki nongdie jingdie madan na ki surok ba shi lynter jong ka Laitumkhrah bad Dhankheti bad ia kine la pynkynriah shaka jaka ieng kali ha Dhankheti bad ha Brightwell Bungalow Barik.

Haduh mynta ka Sorkar kala dep ban pynkynriah haduh 750 ngut ki nongdie jingdie madan sha kiwei ki jaka bala ithuh kyrpang kata na 387 ngut na Khyndailad la pynkynriah sha ka Parking Lot ka MUDA, 3 ngut Surok Quinton sha SBI Parking Lot, 20 ngut na Civil Hospital sha Barik Compound, 48 ngut na Polo sha Iew Polo Hawkers Market 8 ngut na Dhankheti-Malki sha ka jaka ieng kali ha Dhankheti, 85 ngut na Laitumkhrah sha Dhankheti Parking Lot bad Brightwell Bungalow, 2 ngut na jan Ïing u Lat sha ka jaka ieng kali marpyrshah SBI, 95 ngut na Jail Road shaka jaka ieng kali marpyrshah SBI, Iew Polo Hawkers Market, 90 ngut na Laban, Barik, Lumshatsngi bad ka Red Cross sha Brightwell Bungalow bad ka jaka ieng kali marpyrshah ka SBI, 3 ngut na Lachumiere sha Brightwell Bungalow.

Ban pynsuk bad kyrshan iaki nongdie jingdie madan, ka Sorkar kan kyrshan iaki lyngba ka skhim Chief Minister’s Urban Livelihood Grantia iaki ba don CoV mar T.20,000 kata T.10,000 haka por kynriah shaki jaka thymmai bad mar T.2,000 man u bnai na ka bynta ki san bnai.