Ka roi ka par ka dei ban sdang na ki shnong kyndong, ong u Conrad

Ki surok ki wanrah ka jingkylla ha ki thain kyndong bad plie lad ia ka jingkiew ki District, ka project ba T.140 klur ba la bei da ka sorkar jylla ban shna pynheh ia ka surok Weiloi-Mawkyrwat-Rangthong ha South West Khasi ban pyniasoh bad kiwei ki shnong kan kyntiew ia ka roi ka par, la ong u Conrad K Sangma Myntri Rangbah ka Jylla.

Ia kane ula kren ha ka jingialang buh mawnongrim ban shna pynheh ka surok Weiloi-Mawkyrwat-Rangthong ha ka jingdonlang u Symbud Myntri Rangbah Bah Prestone Tynsong, Myntri kam jngohkai u Timothy D Shira, MLA Bah Renikton Lyngdoh, Pius Marwein, Olan Sing Suin, u Dr Celestine Lyngdoh, ki ophisar bad ki riew rangbah.

Haba ai jingkren ha ka jingialang u Myntri Rangbah ula ban jur ki jingkynshew pisa ha ki jingtei ki dei ki jingkynshew ha ki briew. “Man ka tyngka ngi theh pisa ban tei ki lad pyniasoh kam dei tang ha ka rong bad u maw. Ka dei ka jingpynlut na bynta ki briew ba kin suk ka leit ka wan khamtam ki longkmie ban poi sha ki hospital bad kumjuh ban kyntiew ia ki nongrep ban pynpoi mar sha ki iew” ula bynrap.

Ula ong ka sorkar ka la phaikhmat ban pynbiang tarajur ka roi ka par ha man ki thain bad ban jur ka roi ka par ha Meghalaya ka dei ban long khlem noh shiliang ha baroh ki district. “Ka thong jong ka sorkar ka long ban ym dong ki thain, ki district ban shah ieh shadien. Ka roi ka par ka dei ban sdang na ki jaka kyndong bad sha man ki shnong” ula ong.

U Myntri Rangbah ula pynpaw ki district ba la shah ieh bein baroh shikatta kum ka South West Khasi Hills, South Garo Hills bad East Jaintia Hills, ki don mynta hapdeng ki mat pynroi ka Sorkar. “Ka don ka por shisien la khein kum ki jaka kyndong bad la shah ieh bein hynrei mynta ki la kylla ki jaka pynroi.” ula bynrap.

Haba kren halor ka project, u Myntri Rangbah u pyntip naduh u snem 2018, palat T.850 klur ki project la pyntrei ha South West Khasi Hills bad haduh mynta ki project kam pynroi ha ki kot T.990 klur ha South West Khasi, kynthup ia ki surok, ki skhim umbam, jaka pule, jaka sumar bad ki kam pynroi kam jngohkai, kaba pynpaw ia ka rukom treikam ban kyntiew ki kam pynroi ha baroh ki District.

Ula iathuh palat 3200 Km ka surok lah dep ban shna ha kylleng ka Jylla ha ki phra snem ba la dep kaba kaba long 1 km ha ka shisngi bad ka bym pat ju jia mynno ha ka jylla.

“Ka surok Weiloi-Mawkyrwat-Rangthong kan plie lad ha ka kam jngohkai, ka rep ka riang, ka khaii pateng bad pule dangle. Ka lad pyniasoh ka dei u budlum ba wanrah ia baroh ki kam pynroi” ula ong bad bynrap la ka project kan kyntiew ia ka kam jngohkai ha South West Khasi Hills bad pynkhlain ki lad pyniasoh ia ki iew ki hat ki nongrep bad ki nongsengkam lajong.