Dawa u Bah Titos ban kyntiew kyrdan ïa ka surok Umtyngar-Shella shaka State Highway

U MDC ka Sohra constituency uba dei ruh u nongialam ka UDP u u Bah Titostarwell Chyne u la kyrpad ia ka Sorkar Meghalaya ba kan pynkloi noh ia kane ka jingthmu kaba la sahteng la slem ban pynbna bad ban kyntiew kyrdan noh iaka surok naduh Umtyngar sha Shella sha ka State Highway.

Haba kren shaki lad patahi khubor u Bah Titos ula baka pynpaw baka jingdawa ban kyntiew kyrdan iaka surok Umtyngar- Shella sha ka State Highway kadei kaba la angnud bad kyrshan nyngkong da u Myntri Rangbah barim, u Dr Donkupar Roy uba la khlad noh.

U Bah Titos ula iathuh ba u Dr.Donkupar Roy (Bam Kwai Dwar u Blei) ula ïasaid bunsien na ka bynta kane ka projek ha ka por ba u long Myntr hynrei kane ka jingdawa ka dang sah khlem urlong watla ka kadei ruh ka jingangnud kaba la slem bha jong ki nongshong shnong jong ka thaiñ.

Haba pynksan ïa ka jingdonkam jong ka surok ban kyntiew ia ka ioh ka kot, u Bah Titos u la kdew ba ka surok Shillong-Sohra kadei ka surok VIP namar bun riew pawkhmat kiba wan sha Meghalaya, ki ju leit kais ha Sohra.

U la pynpaw ba ka jingpynkylla iaka surok naduh Umtyngar sha Shella kum ka State Highway kan ai jingmyntoi shibun ia ki paidbah bad kan pynskhem ia ki jingtei ha ka kam jngohkai pyrthei ha kylleng ka thain Sohra.

“Ka jingkyntiew kyrdan iaka surok Umtyngar-Shella kan pynduna ïa ka jingkhapngiah jong ka surok, kan pynlyngkot ïa ka jingjngai jong ka jingleit jingwan baroh kawei, bad ka lah ban pynduna ïa ka por leit jingleit sha Sohra da 10 haduh 15 minit” la ong u Bah Titos.

U Bah Titos u kyntu iaka Sorkar ban tuklar mardor bad ban pynsted ïa ka jingtyrwa bad ban pynurlong noh ia kane ka project.