Paw ka Myriaw PHC na ka jingtrei shitom u Dr Raj Kamal Rabidas

Ka khubor kaba ki paidbah ki iaroh ia uwei u Doktor uba la tip kyrteng kum u Dr. Raj Kamal Rabidas ka la saphriang bha ha ka thain Myriaw.Kaba kham pynsngewtynnad ia ki paidbah ka long ba une u doktor u nang ban kren Khasi bad ka ktien ki briew sha katei ka thain ha kine ki khyndiat snem ba ula don ha katei ka thain ban shakri ia ki paidbah.Une u doktor u dei uba trei ha Myriaw Primary Health Centre, kaba jngai kumba 15 km na Kynshi, ha Eastern West Khasi Hills District.Ha ka jingiakren bad une u Doktor, ula iathuh haba nyngkong ula wan trei ha u snem 2021 bad ha katei snem, ka Myriaw PHC ka long lyngkrang ha kaba tang ki dawai tang ka paracetamol ruh ym don, ki injekshon ruh ym don eiei katba ki nongpang ki bun ba wan wad jingsumar.

Ula iathuh ha ka jingshisha u mut ban shu wan trei tang 6 bnai eiei ban trei noh ha ka hospital ka sorkar India ha NEIGRIHMS, hynrei haba u kynduh bad iohi ia ki briew kiba wan shah sumar, ki dei kiba duk kiba jynjar ka la ktah ia ka mynsiem jong u bad mynta ula shakri 5 snem kynthih ha katei ka thain. “Na ka jingbym biang ki dawai, ki jingdonkam bad ka jingsumar, bun ki nongpang ki leit sha Mairang sha Sor Shillong, kumta nga hap ban trei shitom ban pynbha ia kane ka PHC bad mynta ki paidbah ki la sdang ban shim dawai bad shah sumar noh ha Myriaw PHC khamtam kiba duk kiba jynjar,” ong u Doktor Rabidas.

Une u doktor ula iathuh ka kam jong u ka long ban iarap ia ki nongpang kiba duk bad ka kam jong u ka long ym ban shakri ia ka pisa hynrei ka long ban shakri ia ki paidbah.Hadien ka jingwan une u doktor kane ka PHC ka la dei kawei kaba pawkhmat bha ha ka jylla. Lyngba ka jingkitkhia bad trei shitom jong u, mynta wat ia ki injekshon bad ait ksew, lah ban ioh ha PHC hynrei mynshwa hap leit sha Mairang ne sha Shillong.