T.3.14 klur sam jingïarap u Myntri Rangbah ha Garo Hills

U Myntri Rangbah ka Jylla ConradK Sangma mynta ka sngi ula aiti palat 62 tylli ki sanction order hapoh ka Chief Minister’s Special Development Fund (CMSDF) bad ka Chief Minister’s Special Grant (CMSG) ha Tura.
Kane ka jingsam ka dei na ka bynta ki 40 tylli ki constituency ka Jylla kynthup ia 54 tylli na ka CMSDF bad 10 tylli na ka CMSG ba shongdor baroh
haduh T.3.14 klur. Na kine ki 62 tylli ki sanction order, 32 ngut ki nongioh bynta ki dei ki nongshong shnong ba iakynduh markhmat da lade ia u Myntri Rangbah ha ka CM Dorbar ba long ha u bnai Iaiong, Jymmang, Jylliew bad Naitung ha Tura bad ha kiwei ki jaka ka ri-lum Garo.
Ia ki dorkhas ki la pynkylla sha ki sanction order hapoh ka 105 sngi, ha kaba 11 tylli ki dorkhas na ka darbar ba long ha u Naitung la pynlait noh tang hapoh ka hynniew taiew. Ki 24 tylli ba sah ki dei ba bud dien na ki record ba don ha Ophis bad ki constituency bad phra tylli ki jingtyrwa thymmai ba wan lyngba ki MLA bad ki tnad treikam.
Kine ki sanction order kin kyrshan ban tei ia ki jingdonkam paidbah ha kylleng ka ri-lum Garo. Kine ki kynthup ia T.19.3 lak na ka bynta ki iing skul ban maramot bad painkhana, T.81.5 lak na bynta ki 16 tylli ki surok bad ki surok dewbilat, T.47 lak na bynta ki 6 tylli ki Community Hall bad ki Nokma Kachari Building, T.38.5 lak na bynta ki phra tylli ki kynroh bad check dam, T.33.2 lak ia ki khyndai tylli ki culvert, footbridge, ki sem bad kiwei bad T.23.3 lak na bynta hynniew tylli ki kam ba ia dei bad ki jingialehkai, ki samla bad ki prokram ba kyrshan ka CMSG.
Ka jingkyrshan na ka CMSG ia ki samla ka kynthup ia ka jingiarap pisa ban pynlong ia ka Open Inter-School Chess Competition ha Ampati, ka Inter Mahari Football Tournament, ka Youth Excursion sha Sikkim, ka Exposure trip ki khynnah pule ka Don Bosco Secondary School Chandigre bad Dalu Govt Higher Secondary School sha Darjeeling, ka jingleit iashim bynta ki samla ha ka World Youth Day 2027 ha South Korea bad ka jingthied ia ki tiar put tiar tem na bynta ki kynhun tem ka thain.
Ia kine ki kam yn pyntrei da ki Self Help Group, School Managing Committee, ki Sports Associaton, Village Development Committee bad ki Dorbar Shnong.
Napdeng jong ki ka dei ka jingiarap ban shna ia ka footbridge ha Chasingre, ka surok dewbilat ha Rongkhon Songgital, ka Check Dam bad ka kynroh ha Amongpara, box culvert ha Kongbangpara, School Building ka Jesus Blessing English School ha Sonagre, ka basketball court ha St. Andrew Secondary School, Building ka Babelapara Higher Secondary School, ka School Van ka St. Alphonsa’s School, ka Community Hall ha Rimrangpara, surok CC ba lah ban iaid ki jeep ha Chengkurigre bad Gongglanggre, culverts ha wadduid Nepal Chiga, ka kynroh ha Gambal Ading, jingpynbha ia ka madan ialehkai ha Rongkemgre, maramot ia ka Adhoc LP School ha Asibra bad ka kynroh ha Tewaligre Catholic Church.