Lada nga jop kum u MP, ngan khyrwait shabi ban pynkut phet seng ki MLA, ong u bah Vivanstone

U Nongsaidain ka jylla u bah Vivanstone G Kharngapkynta uba dei ruh u kyrtong ka UDP, ula ong ba ka jingkyntiap seng ki 8 ngut ki MLA ka dei namar ba don ka jingkynriang khyndiat jong ka ain Anti Defection Law.

U bah Vivanstone haba kren sha ki nongthoh khubor ula ong ba lada u ioh ka lad ba un long kum u MP kaba nyngkong eh kaba un khyrwait shabi ka dei ka 10th Schedule, khnang ban pynkut noh ka jingphet seng ki MLA.

Katkum ka jingong u bah Vivanstone, kane ka ain 10th Schedule dei ban pyniap noh bad dei ban pynmih noh da kawei ka ain kaban ong ba ‘Lada kino kino ki MP ne ki MLA lada ki kwah ban phet seng hadien ba la jop, kidei ban shu risain noh shwa namar ba kan dei ka jingshet kylla ia u paidbah’.

“ Lada nga jop kum u MP ha kane ka kynti, ngan rah ia kane ka mat ha Parliament ha kaba ki MLA ne MP kim lah ban phet seng haduh ban kut syndon ka samoi bad lada ki kwah ban phet seng, ki dei ban risain shwa ban leit pan biang ia ka bor na u paidbah, ym ban pyllong ia ka kam MP, MLA kum ka kam khaii,” ong u bah Vivanstone.

Ha kajuh ka por, ula buh jingkylli ruh ia ki 8 ngut ki MLA ka UDP kiba phet ban iasoh bad ka BJP.

Ula ong ba ka jingkylli ka long hato kila ioh ia kita ki mat ba kila buh kumba kila pynpaw bad hato u Amit Shah ula wan ban pyndeng mufflar ne em ia ki ha Shillong.

“ Ngam shym la iohi ba kita ki mat kin urlong hashwa ba kin iasoh sha ka BJP. Kita ki mat kidei tang ban pynbiej paidbah,” ula ong.

U bah Vivanstone ula ong ba ki paidbah kila buh jingkylli ba kumno ki MLA ka UDP ki leit deng mufflar pynban ialade sha Delhi haba la jied ia ki ha kane ka jylla.

Ula ong ba lada u Speaker u bishar hok shisha, kine ki 8 ngut kiba phet seng ki lah ban shah mait kyrteng ne ka jinglong MLA namar ba kila mih khlem thaw shwa ia ka kynhun katkum ka ain 10th Schedule.