Ka SIR kan pynthikna ba ki mynder ri kin ym ioh thep vote ha Jylla: Sanbor

Ka jingleh Special Intensive Revision (SIR) ia ka Electoral Roll ha Meghalaya bad kylleng ka Ri ka long ban pynthikna ba ki mynder ri kin ym ioh ia ka hok ban thep vote ha Meghalaya” la ong Bah Sanbor Shullai Myntri Sorkar Jylla bad u Nongialam ka BJP.

Haba iakren bad ki nongthoh khubor u Bah Sanbor ula ong, ka jingleh ia ka SIR ka ka long ban tehlakam ba ki briew nabar kin ym ioh lad ban thep vote ha Jylla bad ula kynnoh ka seng Congress ka la pynphriang khubor thok bad shukor ban pynsuki ia ka kam. Ula kam ba ka Election Commission ka la pynmih ia ka kyrwoh ne ka Joint Press Note hadien ba la dep ka jingialang ka Commission bad ka la pynshai halor ki jingkynnoh ki seng ba don ha ka Liang Pyrshah.

“Ka Joint Press Note jong ka Commission, ka la pynshisha da kawei ka sur ba ka Congress bad ki seng sain pyrthei ba don ha ka I.N.D.I. Alliance ki la thok bad ialam bakla ia ki paitbah ka ri ban pynmih ka jingsyier bad ban leh ki kam bym hok” ong u Bah Shullai.

Ula kynnoh ka Congress ka la iakhih paitbah ha Meghalaya ruh, katba ka jingleh ia ka SIR ka dei ba dang iaid shakhmat bad ula kyntu ia ki paitbah kim dei ban ngop ha kine ki jingkam shukor ka Congress.

“Ki paitbah ka Meghalaya ki la iohi ba 3 ngut ki Election Commissioner ki iatreilang bad la rekod ia ki jingmynjur man ki rai ba kongsan. Nga kwah ban kylli balei ka Congress balei kane ka dei tang ka mat ban pynsaphriang ia ki khubor thok? Ka SIR ka dei ka sienjam ba kongsan ban pynthikna ba ki briew ba wan rung be-aiñ kin ym ioh ban thep vote ha Meghalaya bad ngi ieng skhem ban pynthikna kan long kaba jop” la ong u Bah Sanbor.

“Ka Statutory Declaration ba iasoh bad ka Form-6 jong ka SIR ka dei ba la khmih bniah bha bad ka dei ruh ba la pynskhem da ka Supreme Court. Hato ka Congress bad ki paralok ki buh jingkylli ia ka ïing bishar ba hakhlieh duh ka ri, ha ka kyrteng ban iada ia ka synshar paitbah, la buh jingkylli u Nongialam ka BJP.

U Bah Shullai ula ong, ba kim sngew kyndit shuh ki lah bud dien bha ia ka rukom treikam ka seng Congress ha kine ki snem, kaba kwah tang ban shu ioh nong mardor, ka Congress ka ju mlien ban kynthoh ia ka Election Commission, ki ïing bishar bad ia kiwei pat ki bor ba treikam laitluid.

“Ki lah buh jingkylli halor ki EVM ha man ba rem elekshon, ka dei ba iai jia ha kine ki sngi. Ki la buh jingkylli ruh ia ki kam ba ia dei bad ka jingiada ri bad mynta ia u National Security Advisor” la ong u Bah Sanbor.

Ula ong, ki paitbah ka Meghalaya ki la kyntait ia ka seng Congress bad ia ki paralok ki jong ka bad mynta ki pyrshang ban shim kabu ia ka jingkwah u paitbah da kaba pynphriang khubor thok.