Ka sorkar MDA ka skhem, kyntait u Conrad ba thmu leit iasoh BJP ki MLA NPP

U Myntri Rangbah ka Jylla u Conrad K Sangma uba long ruh National President ka NPP ula kyntait ia ka khubor ba ki MLA NPP ki thmu ban leit iasoh BJP bad kane ka dei khubor ba shu mutdur da ki katto katne ka bym don Nongrim.

U Myntri Rangbah ula ong, “Kine ki dei tang ki khubor hamsaia bad ki dei tang ki jingmutdur ba ki briew ki la pynsaphriang bad la shu rai ia kaei kaei ba ki la shu thaw hi. Nga pynshai kine ki dei tang ki khubor hamasaia”.

“Katto katne kiba sngewkhia, lehse ki thaw da ki lad pathai khubor bad ki riewshimet hynrei nga pynthikna ba ki MLA, ka Sorkar Synroplang bad ia ki paitbah baroh, ba kam don kano kano ka jingpyrshang bad kan ym don ban sngew khuslai ha kaba ia dei bad katei ka mat” la ong u Conrad.

U la bynrap la ka Sorkar MDA-II ka skhem bad tang ka seng NPP ka la don lypa 33 ngut ki MLA bad kine baroh ki iatylli bad ki don ruh ki paralok ba iatreilang ha ka Sorkar MDA-II.

U Conrad ula ong, “Ka jinglong jingman ka lah ban kylla hapdeng ki paralok ba iatreilang hynrei ka jingkhlain ka MDA ka neh kumjuh namar ki paralok ba iatreilang ki neh kumjuh, ka don ka ishu hapdeng ar tylli ki kynhun ba iatreilang bad kane ka dei ka kam iing jong ki bad kam ktah pat ia ka jingdon paid ne ka Sorkar MDA-II”.

U Myntri Rangbah ka Jylla ula khein kamkai ruh ia ka jingpynsaphriang ia ki khubor hamsaia ba ka NPP kan weng noh ia ka BJP na ka Sorkar MDA bad ula ong ba kam shym la don ruh ka jingiakren ban ai shuki myntri ia ki 8 ngut ki MLA ka UDP kiba la leit pyniasoh noh dang shen sha ka seng BJP.

“Ka NPP ka ioh ka jingbun paid 33 ngut ki MLA bad ki lada ki kwah kan jin da la weng lut ia baroh ki paralok ha ka jingbujli shuki myntri, hynrei kum ka kynhun synroplang bad kum ka seng saiñ pyrthei ka la kren shai halor ki nongrim ba ngi thaw ia ka sorkar synrop da kawei ka nongrim ban iatreilang haduh ba kut” la ong u Conrad.

Ula pynshai haduh mynta kam don ka jingiakren halor ka jingthmu ban pynrung Myntri na ki 8 ngut ki MLA ba leit iasoh dang shen sha ka BJP.