Ki MLA kyntiap seng ki ‘Messiah’ ban pynkylla ba mut na kam tih dewiong

U Nongialam ka Liang Pyrshah u Dr Mukul Sangma ula kop ba um leit pyniasoh bad ka BJP ne National Party bad ka seng BJP kan ym lah ban pynpra ia ka AITC ha ka Jylla Meghalaya.

Halor ka jingkylli u Dr Mukul ula ong, “Phim lah ban batai la ka BJP ka leit khroh briew. Nga la ai ia ki nuksa ha kiwei pat ki Jylla. Balei ba nga ai ia kine ki nuksa?. Phi lah ban pyrkhat hi”

U Dr Mukul ula ther ia ka BJP ba ka leh politik ai mar kylliang ban tan ia ki 8 ngut ki MLA ka UDP da ka jingkular thok ha shuwa ka ilekshon MLA 2028.

“Halor ka kam tih dewiong ki ong, ba kan sa sdang hapoh hynriew bnai ha u 2018. Hato kam dei ka jingshisha. Ka jingpynbiej jong ka BJP kynthup u General Secretary ba khmih ia ka Meghalaya, ki la ai ia kawei ka jingkren hadien kawei pat ha ka elekshon 2018 la kum ba kin leh kam phylla. Ki la pynlong kam kai ia ki paidbah. Ki la kular bad ka jingbym lah ban pyntreikam ki kular ka dei ka jingthok. Haba phi kular hynrei phim pyntreikam ka dei ka kam thok.” la ong u Dr Mukul.

U Nongialam ka Liang Pyrshah ula ong, ba ki nongphet seng ki la pyrshang ban pynksan ia ka jingkyntiap seng da kaba pynlong ka BJP kum ka nongpynim ia ka kam tih dewiong bad ki la pyrshang ban pynngeit ia ki paidbah ba ioh ki la kylla long kum ki ‘Messiah’ ban pynsted ia ka kam tih dewiong.

“Nga sngewsih halor kane ka dei tang ka jingpynksan namar ka jinglong lanot na ka jingshah tan. Hooid, ki dei ki lanot ba shah tan bad ki la leit ym na ka bynta ka bha ka miat u paidbah, ym ban pynsted ia ka kam tih dewiong” la kynnoh u Dr Mukul.