Kynduh ka ka FKJGP ïa u SDO ba sniew palat ka surok Baridua-Killing

Haba pynpaw ia ka jingsngewkhia halor ka jingsniew ki surok ha thain Baridua bad Killing, ki nongialam ka FKJGP Baridua Circle hapoh ka jingialam u Samla Denis Nongrum, President nangta u Samla Allan D. Sohpdang, General Secretary mynta ka sngi, ki la leit ban kynduh ia u SDO PWD Nongpoh, kata na bynta ban pynpaw halor ka jingeh ba ki paidbah nongleit nongwan bad ki khynnah skul ka thain ki kynduh namar ka jingsiew ka surok.

Haba leit ban kynduh bad phah jingthoh sha utei u ophisar PWD, kitei ki nongialam FKJGP, ki la ioh ban pynpaw bad batai halor ka jingeh ki paidbah bad khamtam eh ki khynnah skul, namar ba la sniew palat ka surok, ha kaba ki la kyrpad ia ka tnat PWD ba kin leh shitom, na bynta ban ioh maramot ia kitei ki surok sniew, na bynta ban suk ka leit ka wan ki paidbah.

Hadien ba la dep ban kynduh ia u ophisar PWD, kitei ki nongialam FKJGP haba kren sha ki lad pathaikhubor, ki la iathuh ba ha ka jingiakren jong ki bad u ophisar, na ka liang u ophisar, u la pynshai sha ki da kaba ong, ba ka tnat PWD ka la pyrshang ban thaw ia ki lad ki lynti ban pynbha ia kitei ki surok ha Killing bad Baridua.

Shuh shuh, ki la ong ba ki la ioh ban pynsngew halor ka jingdonkam ban don ki nala pyniaid um kiba biang, ha ki surok kiba don ha katei ka thain, namar tang ba la dei ki por hap slap, kaba mut ba ka um ka iaid napdeng surok bad kata ka dei namar ka jingbymbiang ki nala.

Namarkata, lyngba katei ka jingleit ban kynduh ia utei u ophisar sorkar, na ka liang ka seng, ka kyntu ia ka tnat PWD bad ia ka sorkar, ba kan shimkhia ban pynbha ia kitei ki surok ha katei ka thain, khang ban suk ka leit ka wan ki paidbah bad khamtam eh ki khynnah skul bad ki samla pule kiba pule ha katei ka thain.

Leave a Reply

Your email address will not be published. Required fields are marked *