Ka jingkren u Dy CM ia ki nonghikai ka long tohmet u dei ban pan mab: Dr Mukul

U Myntri Rangbah barim ka Jylla Meghalaya bad u nongïalam ka liang pyrshah u Dr Mukul Sangma ula ther ïa u Symbud Myntri Rangbah Myntri u Bah Prestone Tynsong halor ki jingkren tohmet ia ki nonghikai Deficit kiba dang bteng ia ka jingiakhih.

U Dr Mukul ula kynnoh ba u Bah Prestone Tynsong um don jingsngewkhia ia ka pule puthi bad ia ka jingeh ki nonghikai.

Da kaba kynthoh jur ia ki jingkren u Bah Prestone, u Dr. Mukul ula shim na la ki jong ki tynrai kiba jylliew bha kum u khun ba sngew sarong jong ki nonghikai da kaba ong ba ki kmie ki kpa jong u ki dei ki nonghikai.

U Dr Mukul u pynpaw ïa ka jingsngewsih kaba jur ba u nongthaw aiñ ba rangbah uba don ha ka kyrdan u lah ban kynthoh tohmet ïa ki nonghikai.

Ula kynnoh ruh ba ka rukom pynïaid jong ka sorkar jylla ïa ki jingïakhih jong ki nonghikai kiba dang ïaid shakhmat bad ïa ka tnad pule puthi ka long ka bym don jingkitkhlieh bad ula ong ba mynta ka tnad ka don ha ka jingma kaba khraw.

“Nga ai jingmut ia u Symbud Myntri Rangbah ban panmap na ki nonghikai namar kane ka jingkren u ka long kaba ktah mationg ym tang ia ki nonghikai Deficit kiba iakhih hynrei ia baroh ki nonghikai hapoh ka Jylla Meghalaya” la ong u Dr Mukul.

U Dr Mukul ula dawa na ka Sorkar ban khot iakren ia ki nonghikai Deficit khnang ban ioh iakren bad ioh pynbeit iaki jingeh jong ki.

Leave a Reply

Your email address will not be published. Required fields are marked *