Ki Nongtrei ka skulbah North Eastern Hills University (NEHU) hapoh ka shatri jong NEHU Non-Teaching Staff Association (NEHUNTSA) hynne ka sngi ki la sdang ka jingiakhih shong sngi (Pen Down Strike) khlem pud sngi. Ha kane ka sngi, la sakhi ba ki kam ki jam ha kane skulbah kila sangeh lut kaba la ktah ym tang iaka NEHU hynrei wat iaki samla pule bad ki Nonghikai. Kane ka jingiakhih shong sngi jong ka (NEHUNTSA) ka dei pyrshah ia ka jingslem ki bor pyniaid ka NEHU ban khot thep kam Nongtrei bad ka jingslem ban kyntiew kyrdan ia ki Nongtrei hapoh ka skulbah. Haba kren sha ki lad pathai khubor u president ka NEHUNTSA, u Dr WR Synrem ula iathuh ba naduh 3 tarik Naiweng 2023, ka NEHU ka la dep pynmih jingpynbna paidbah ba lait kam hapoh ka skulbah hynrei mynta la shi snem, kane ka jingkhot thep kam, kam shym la poi shano shano ruh.
U Dr Synrem u la iathuh ha ka jingshisha ka National Testing Agency (NTA) ka la dei ban pynlong iaka eksamin hynrei namar ka ilekshon MP, ka NTA ka la phah shithi sha ka NEHU ba kam lah shuh ban pynlong ia ka eksamin thep kam. U la iathuh ba ka NEHU kala dep ruh ban khot Expression of Interest (EIO) ha u bnai Nailur 2024 ban ioh Agency ban pynlong iaka eksamin. “Hadien baka NEHU ka khlem lah shuh ban pyntyllun ia ki kam haba ia dei bad ka jingkhot thepkam Nongtrei (Non-Teaching), ngi la khot ia ka jingialang bad ngi la shim iaka rai ban iakhih daka ba shong sngi (Pen Down Strike) khlem pud sngi tad haduh ba ki bor pyniaid ka NEHU ki khot iakren” la ong u Dr Synrem. U Dr Synrem u la iathuh ba haduh mynta ki don 250 ngut ki dkhot ka NEHUNTSA hapoh NEHU Shillong bad Tura.
“Ka jingdon ki nongtrei mynta ka long tang 250 ngut ha NEHU Shillong bad Tura Campus bad mynta u snem kumba 50 tam ki nongtrei ki la shongthait. La shem snem ruh, ki nongtrei ki ban shongthait kin long kumjuh. Kumta lada ka jingthungkam kam don, ngi sheptieng ba mano ban trei hapoh ka University bad kumno ka University kan treikam khamtam ki nongtrei kiba iadei kam bad ki nonghikai bad ki samla pule. Baroh ki kam kin sa shah ktah lut lada kim don ki nongtrei” u la ong.